ភ្នំពេញ ៖ អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសាន នៅព្រឹកថ្ងៃទី១៨ មករា ឆ្នាំ២០១៨នេះ តាមរយៈបណ្តាញទំនាក់ទំនង Telegram បានលើកឡើងថា ទណ្ឌិត សម រង្សី បានធ្វើនយោបាយបាត់ម្ចាស់ការ ហើយជារឿងគួរឲ្យចង់អស់សំណើចណាស់ ដែលអួតខ្លួនថាជាបញ្ញាវ័ន្ត មានសញ្ញាប័ត្រនៅស្រុកបារាំង តែមកធ្វើនយោបាយនៅស្រុកខ្មែរ មិនបានស្មើកូនសិស្សលោកផង តើឲ្យប្រជាជនពឹងផ្អែកម៉េចបានទៅ បើធ្វើ នយោបាយ ទៅមុខទៅក្រោយរកប្រាកដប្រជា មិនបានយ៉ាងនេះ នៅទីបំផុតបរាជ័យរហូត ។
ឯកឧត្តម សុខ ឥសាន បានបញ្ជាក់បន្ថែមទៀតថា “អតីតៈបក្សសង្គ្រោះជាតិ ហ្នឹងហើយ សុទ្ធតែជាស្នាដៃ របស់ សម រង្សី ។ គោលបំណងបង្កើត ដើម្បីឲ្យវាខ្លាំង តែផ្ទុយទៅវិញ បែរជាទទួលបានលទ្ធផលអវិជ្ជមានទៅវិញ គឺ រង្គោះរង្គើ បែកបាក់ មើលមុខគ្នាមិនចំ ប្រកាន់បក្សពួកជាប់ជាប្រចាំ រកការឯកភាពគ្នាមិនបាន កាច់កុងគ្នាគ្មាន ទីបញ្ចប់ រហូតដករលាយ ហើយនៅតែអួតថាខ្លាំងទៀត “។
បើតាមលោក ឯកឧត្តម ឥសាន “ឥឡូវ ក្រោយបក្សសង្គ្រោះ ត្រូវបានរំលាយចោល ដោយសារ ទង្វើខុសច្បាប់ របស់ខ្លួន អតីតៈក្រុមមេដឹកនាំមួយចំនួន របស់អតីតៈបក្សនេះ បានរត់ទៅបង្កើត របស់ហៅថា ចលនាសង្គ្រោះជាតិ ដោយឃោសនាបំភាន់មតិសាធារណៈ ដោយថាការបង្កើត របស់ដែលហៅថា ចលនាសាង្គ្រោះជាតិ នេះអាចជៀសផុត ពីមានការទទួលខុសត្រូវ ចំពោះមុខច្បាប់ មិនដូចអតីតៈបក្សសាង្គ្រោះនោះទេ” ។
អ្នកនាំពាក្យគណបក្សប្រជាជនកម្ពុជា បានអះអាងទៀតថា នេះជាការយល់ច្រឡំយ៉ាងធំ របស់ទណ្ឌិត សម រង្សី ដែលគ្មានការយល់ដឹង និងទស្សនវិស័យនយោបាយច្បាស់លាស់ ធ្វើអ្វីអត្តនោម័តខ្លួនឯងជារហូត មិនស្តាប់សហការីណាទាំងអស់ ។ ដូច្នេះ បន្ទាប់ពីការ បង្កើតរបស់ដែលហៅថា ចលនាសាង្គ្រោះជាតិ មក មន្ត្រីមួយចំនួនធំ ជាពិសេសអ្នកកឹម សុខានិយម បានបញ្ចេញប្រតិកម្មយ៉ាងខ្លាំងពីការបង្កើតចលនានេះ ។ ឥឡូវសម រង្សី បានបង្ហើរពាក្យថា ការបង្កើតចលនានេះ មិនចាំបាច់មានការឯកភាពពីក្រុមកឹម សុខាទេ ស្រេចនឹងចិត្តខ្លួន ។ នេះជាភ័ស្តុតាងបង្ហាញពីភាពអត្តនោម័តរបស់ សម រង្សី ។
ប៉ុន្តែទោះបីយ៉ាងណា ឯកឧត្តម សុខ ឥសាន ថាការបង្កើតចលនាស្អីក៏ដោយ មានការឯកភាព ឬមិនឯកភាពគ្នាក៏ដោយ រាល់ចលនាដែលបង្កើតឡើង ដោយជន និងក្រុមជនខុសច្បាប់ គឺសុទ្ធតែខុសច្បាប់ដូចគ្នាទាំងអស់ មិនអាចគេចរួចពីសំណាញ់ច្បាប់បានជាដាច់ខាត ។ បើនៅតែង្គើន នាពេលខាងមុខ អាចនឹងប្រឈមនឹងច្បាប់ស្តីពីការដាក់ឲ្យនៅក្រៅច្បាប់ ជាមិនខាន ដូចពួកឧទ្ទាមខ្មែរក្រហមក្រៅច្បាប់ ជាឧទាហរណ៏ស្រាប់ ។ នេះសរបញ្ជាក់ថា ជានយោបាយបាត់ម្ចាស់ការរបស់ទណ្ឌិត សម រង្សី និងបក្សពួកខុសច្បាប់៕
