ព្រឹកថ្ងៃច័ន្ទ ២រោច ខែចេត្រ ឆ្នាំច សំរិទ្ធិស័ក ព.ស.២៥៦២ ត្រូវនឹង ថ្ងៃទី២ ខែមេសា ឆ្នាំ២០១៨ លោកជំទាវ ឧបនាយករដ្ឋមន្រ្ដី ម៉ែន សំអន រដ្ឋមន្ត្រីក្រសួងទំនាក់ទំនងជាមួយ រដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីសម្ពោធ អគារការិយាល័យទី៤ កងពលតូចទ័ពពិសេស ឆ័ត្រយោង៩១១ ស្ថិតក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
ឆ្លៀតក្នុងឱកាសនោះ លោកជំទាវក៏ ពាំនាំការផ្ដាំផ្ញើរ សួរសុខទុក្ខ និងក្ដីនឹករលឹកពីសំណាក់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់អង្គពិធីទាំងមូលផងដែរ។ លោកជំទាវបានបន្តទៀតថា ក្រោមការដឹកនាំប្រកប ដោយកត្តិបណ្ឌិតរបស់ សម្តេច តេជោ ហ៊ុន សែន បាន ធ្វីឲ្យប្រទេសជាតិមានសុខសន្តិភាព និងការអភិវឌ្ឍន៍ លើគ្រប់វិស័យ ដោយបានអនុវត្តនូវនយោបាយឈ្នះ ឈ្នះ ដោយគោរពតាមទៅតាម អភិក្រមទាំង ៤ ដែល ជាសសរស្តម្ភគឺ មនុស្ស ផ្លូវ ទឹក ភ្លើង ។
លោកជំទាវក៏បានថ្លែងអំណរគុណដល់ក្រុមហ៊ុន ផានអ៊ីម៉ិច ដែលមានលោកជំទាវ ស៊ុយ សុផាន ជាប្រធាន និង ឯកឧត្តម តាំង គឹមថុង ដែលបាន ចូលរួមបរិច្ចាកធនធានមានទាំងសម្ភារៈ និងថវិកាជា ច្រើន ដើម្បីរួមចំណែកជួយគាំទ្រ និងលើកទឹកចិត្ដដល់ កងកម្លាំងប្រដាប់អាវុធ ដ៏អង់អាចក្លាហាន ជាពិសេស កងពលតូចទ័ពពិសេសឆ័ត្រយោង៩១១ ដែលមាន ឯកឧត្តម ឧត្តមសេនីយឯក ចាប ភក្តី ជាមេបញ្ជាការ ឱ្យបំពេញភារកិច្ចដ៏ឧត្តុង្គឧត្តមការពារបូរណភាពទឹកដី និងកាន់តែមានកម្លាំងចិត្ត និងភាពកក់ក្ដៅថែមទៀត។
លោកជំទាវក៏បានផ្តាំផ្ញើរជូនអង្គភាព កងពលតូចទ័ពពិសេសឆ័ត្រយោង៩១១ ដូចតទៅ ៖
១-ត្រូវចូលរួមថែរក្សាខឿនការពារជាតិឲ្យបាន រឹងមាំ ដល់កិច្ចការពារបូរណភាពទឹកដី ការពារសន្តិភាព ស្ថិរភាពនយោបាយ និងភាពសុខដុមរមនានៃសង្គមជាតិ តាមរយៈ ការចូលរួម ការបង្កើននូវភាពជិតស្និទ្ធ និង បានដឹងសុខទុក្ខគ្នាទៅវិញទៅមករវាង រាជរដ្ឋាភិបាល វិស័យឯកជន និងវរៈសេនាតូចឈរជើង ។
២-សូមពង្រឹងស្មារតីជឿរជាក់លើការដឹកនាំ របស់ រាជរដ្ឋាភិបាល និងការពារសមិទ្ធផលនានា ដែលចេញពី ការបោះឆ្នោតសកល ជាពិសេសត្រូវការពាររដ្ឋធម្មនុញ្ញ មិនឲ្យពួកអមិត្ត និងប្រឆាំងមានឱកាស ផ្តួលរំលំ រាជរដ្ឋាភិបាលតាមមធ្យោបាយណាមួយបានជា ដាច់ខាត។
៣-ត្រូវបន្តប្រពៃណីតស៊ូ និងស្មារតីស្នេហាជាតិ មាតុភូមិ ហ៊ានធ្វើពលីកម្ម និងលះបង់អ្វីៗទាំងអស់ ដើម្បីបុព្វហហេតុជាតិ មាតុភូមិ និងប្រជាជន និងចេះរួមសាមគ្គីគ្នា និងស្រឡាញ់រាប់អានគ្នា ជាធ្លុងមួយ។
៤.ត្រូវការពារបូរណភាពទឹកដីឲ្យបានដាច់ខាត មិនឲ្យខ្មាំងសត្រូវឈ្លាន ពានទឹកដីបានសូម្បីតែមួយ ចំអាម តែមិនត្រូវឈ្លានពានប្រទេសជិតខាងឡើយ និងត្រូវបង្កើនស្មារតីសាមគ្គីភាពក្នុងនាមជាប្រទេសជិតខាងល្អ។
៥-សូមខិតខំបង្កើនសមត្ថភាពការងារជំនាញ តាមរយៈហ្វឹកហាត់ ជាប្រចាំ និងប្រកាន់ខ្ជាប់នូវវិន័យ របស់កងទ័ព រក្សាសីលធម៌ ស្អាតស្អំ និងកិត្តិយសថ្លៃថ្នូ សក្តិសមជាកងទ័ពជាតិបំរើប្រជាជន។
