(ភ្នំពេញ)៖ ក្រៅពីខុទ្ទកាល័យនាយករដ្ឋមន្ដ្រី, ក្រសួងការពារជាតិ, អគ្គមេបញ្ជាការ និងមេបញ្ជាការដ្ឋានអង្គរក្ស, ឥឡូវនេះ ក្រសួងការបរទេសកម្ពុជា ក៏បានចេញសេចក្ដីថ្លែងការណ៍ប្រកាសថ្កោលទោស និងជំទាស់យ៉ាងខ្លាំងក្លាបំផុតចំពោះ ការសម្រេចដាក់ទណ្ឌកម្ម ពីសំណាក់ក្រសួងរតនាគារអាមេរិក មកលើនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរង និងជាមេបញ្ជាការ បញ្ជាការដ្ឋានអង្គរក្ស។ នេះបើយោងតាមសេចក្ដីថ្លែងការណ៍ របស់អ្នកនាំពាក្យក្រសួងការបរទេសកម្ពុជា ដែលបណ្ដាញព័ត៌មាន Fresh News ទើបទទួលបាននៅមុននេះបន្ដិច នាល្ងាចថ្ងៃទី១៣ ខែមិថុនា ឆ្នាំ២០១៨។
តាមរយៈសេចក្ដីថ្លែងការណ៍ ជាភាសាខ្មែរ និងភាសាអង់គ្លេស ក្រសួងការបរទេសកម្ពុជា បានចាត់ទុកដាក់វិធានការណ៍ទណ្ឌកម្មរបស់ក្រសួងរតនាគារអាមេរិក បានធ្វើឡើង ជាការចោទប្រកាន់ គ្មានមូលដ្ឋាន និងគ្មានការគោរពទាល់តែសោះ ចំពោះភាពឯករាជ្យ នៃច្បាប់ និងយុត្តិធម៌របស់កម្ពុជា ហើយវាជាការបំពាន់ដោយគឃ្លើន លើគោលការណ៍អន្ដរជាតិ ស្ដីពីគោលការណ៍ ស្មើភាពនៃអធិបតេយ្យ និងគោលការណ៍មិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ។
