បន្ទាយមានជ័យ ៖ នៅព្រឹកអង្គារ៧កើតខែបឋមសាឍ ឆ្នាំច សរឹទ្ធិស័ក ព.ស២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ ឯកឧត្តម នាយឧត្តមសេនីយ៍ កែ គឹមយ៉ាន សមាជិកអចិន្រ្តៃយ៍គណកម្មាធិការកណ្តាលគណបក្សប្រជាជនកម្ពុជា ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានកិត្តិយសសមាគមមូលនិធិមនុស្សចាស់ខេត្តបន្ទាយមានជ័យ និងជាប្រធានក្រុមការងារថ្នាក់កណ្តាលចុះជួយខេត្តបន្ទាយមានជ័យ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវផ្លូវបេតុង១ខ្សែប្រវែង២០២០ម៉ែត្រចាប់ពីផ្លូវជាតិលេខ៥ឆ្លងកាត់ភូមិព្រះពន្លា ភូមិព្រៃឬស្សីសង្កាត់ព្រះពន្លា និងសំណេះសំណាលជាមួយប្រជាពលរដ្ឋនៅសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ដែលមានអ្នកចូលរួមជាង៤០០០នាក់។
ក្នុងឱកាសនោះ ឯកឧត្តម នាយឧត្តមសេនីយ៍ កែ គឹមយ៉ាន បានមានមតិសំណេះសំណាលនិងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិមាន សម្ដេចតេជោ ហ៊ុន សែន នាយករដ្ឋមន្រ្តី សម្ដេចអគ្គមហាពញាចក្រីហេង សំរិន ប្រធានរដ្ឋសភា សម្តេចក្រឡាហោម ស ខេង សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា។
ក្នុងឱកាសនោះ ឯកឧត្តម នាយឧត្តមសេនីយ៍ កែ គឹមយ៉ាន បានប្រសាសន៍ថា កម្ពុជាបច្ចុប្បន្នដឹកនាំដោយសម្តេចតេជោ ហ៊ុន សែន ប្រទេសជាតិមានការរីកចម្រើនជាងពេលណាទាំងអស់ ប្រជាពលរដ្ឋរស់នៅជាមួយនឹងសិទ្ធិសេរីភាព ជីវភាពធូរធារ និងកូនចៅយើងបានរៀនសូត្រចេះដឹងចូលរួមកសាងបាននូវសហគមន៍មូលដ្ឋានមានសន្តិភាព សុវត្ថិភាព ផ្ទុយស្រឡះពីរបបប៉ុលពតអតីតកាលដែលមានតែការឈឺចាប់ បែកបាក់ និរាសព្រាត់ប្រាស់ និងអំពើប្រល័យពូជសាសន៍សាហាវយង់ឃ្នងហួសនឹងថ្លែង។
ក្នុងឱកាសនោះដែរ ឯកឧត្តម នាយឧត្តមសេនីយ៍ កែ គឹមយ៉ាន បានថ្លែងអំណរគុណដល់មហាគ្រួសារអ្នកបន្ទាយមានជ័យដែលចូលរួមថែរក្សាបាននូវសុខសន្តិភាព និងចេះឆក់យកឱកាសទាញផលពីសុខសន្តិភាពនេះរួមគ្នាកសាងអភិវឌ្ឍន៍សហគមន៍មូលដ្ឋាន ដូចនេះសូមបងប្អូនអញ្ជើញទៅបោះឆ្នោតជូនគណបក្សប្រជាជនកម្ពុជាដែលមានរូបសញ្ញាទេវតាបាចផ្កា នៅលេខរៀងទី២០ “ ស្រួលចាំ ស្រួលគិត ស្រួលគូស “ នៅថ្ងៃទី២៩ ខែកក្កដា ឆ្នាំ២០១៨ខាងមុខឲ្យបានគ្រប់គ្នា ដើម្បីសម្តេចតេជោហ៊ុនសែនបន្តដឹកនាំនាវាកម្ពុជាឆ្ពោះទៅការអភិវឌ្ឍរីកចម្រើនបន្ថែមទៀត។
ជាវប្បធម៌ចែករំលែក និងគិតគូរពីសុខទុក្ខ ឯកឧត្តម នាយឧត្តមសេនីយ៍ កែ គឹមយ៉ាន បាននាំយកថវិកានិងអំណោយ ចែកជូនមាន ៖
១.ជូនប្រជាពលរដ្ឋចំនួន៤០០០នាក់ ម្នាក់ៗ ទទួលបានសារ៉ុង១
២.ជូនមនុស្សចាស់ពីអាយុ៧០ឆ្នាំឡើងនៅសង្កាត់ព្រះពន្លាចំនួន៤០៩នាក់ ម្នាក់ៗ ទទួលបាន : ថវិកា២ មុឺនរៀល សារ៉ុង ១ បំពង់ទឹកក្ដៅ ១ មី ពិល ទឹកដោះគោ ប្រេងកូឡា ប្រេងខ្យល់ ស្ករស អំបិលអ៊ីយ៉ូតតែ ប្រេងសណ្ដែក កៅអៀក។ ល។
៣.ជូនសាលាសង្កាត់ព្រះពន្លា ថវិកា ១លានរៀល
៤. ជូនដល់មណ្ឌលសុខភាពព្រះពន្លា ថវិកា៥០មុឺនរៀល ។
