(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី១១ ខែកញ្ញា ឆ្នាំ២០១៦ នេះ បានអញ្ជើញចូលរួមនៅក្នុងពិធីសម្ពោធ បើកពិធីតាំងពិព័រណ៌ចិន អាស៊ានលើកទី១៣ ជាផ្លូវការ នៅទីក្រុងណាននីញ ខេត្តក្វាងស៊ី សាធារណរដ្ឋប្រជាមានិតចិន ក្នុងពិធីនេះ ក៏មានការអញ្ជើញចូលរួមពី លោក ចាង កាវលី ឧបនាយករដ្ឋមន្រ្តីចិន និងបណ្ដាប្រមុខថ្នាក់នាំអាស៊ានមួយចំនួនទៀត ព្រមទាំងតំណាងក្រុមហ៊ុនធំៗ និងវិស័យឯកជនជាច្រើននៅក្នុងប្រទេសចិនផងដែរ។
នៅលើបណ្តាញសង្គម Facebook សម្ដេចតេជោ ហ៊ុន សែន បានលើកឡើងថា «វត្តមានសម្តេចអញ្ជើញចូលរួមក្នុងពិធីពិពរណ៍នេះ គឺដើម្បីកៀងគរអ្នកវិនិយោគចិនទៅវិនិយោគនៅកម្ពុជា ឱ្យកាន់តែច្រើនឡើងថែមទៀត និងដើម្បីបង្ហាញផលិតផលខ្មែរ មកកាន់ទីផ្សារប្រទេសចិន។ ជាពិសេសទៀតនោះ គឺដើម្បីពង្រឹងទំនាក់ទំនងសហប្រតិបត្តិការផ្នែកសេដ្ឋកិច្ច ពាណិជ្ជកម្ម រវាងចិន និងកម្ពុជាឱ្យកាន់តែប្រសើរឡើង»។
សូមបញ្ជាក់ថា សម្តេចតេជោនាយករដ្ឋមន្រ្តីព្រះរាជាណាចក្រកម្ពុជា កំពុងនឹងដឹកនាំគណៈប្រតិភូចូលរួមព្រឹត្តិការណ៍តាំងពិព័រណ៍ ចិន-អាស៊ានលើកទី១៣ នៅទីក្រុងទីក្រុងណាននីង ខេត្តក្វាងស៊ី ប្រទេសចិន។ សម្តេចតេជោក៏នឹងអញ្ជើញចូលរួមវេទិកា ស្តីពីពាណិជ្ជកម្ម និងវិនិយោគកម្ពុជា ចិន លើកទី១ ផងដែរ ដែលនឹងធ្វើឡើងនៅថ្ងៃទី១២ ខែកញ្ញា។
តាមរយៈវេទិកា នាយករដ្ឋមន្រ្តីកម្ពុជា រំពឹងថា នឹងជួយកៀរគរវិនិយោគិនចិន នៅខេត្តក្វាងស៊ីមកបណ្តាក់ទុនវិនិយោគឲ្យកាន់តែច្រើន ថែមទៀតនៅប្រទេសកម្ពុជា៕