នៅរសៀលថ្ងៃទី២៣ ខែកក្កដា ឆ្នាំ២០១៨ ឯកឧត្តម គួច ចំរើន អភិបាលខេត្តកំពង់ចាម បានអញ្ជើញបើកការដ្ឋានធ្វើផ្លូវបេតុងមួយខ្សែមានប្រវែង ១៦៦០ម៉ែត្រ និងទទឹង៧ម៉ែត្រ ដែលស្ថិតក្នុងភូមិទី៩ ឃុំព្រែកតានុង ស្រុកកោះសូទិន ខេត្តកំពង់ចាម។
ឯកឧត្តម គួច ចំរើន បានលើកឡើងថា ផ្លូវបេតុងមួយខ្សែនេះ បានការឧបត្ថម្ភថវិការបស់ក្រសួងសាធារណ:ការ និងដឹកជញ្ជូន កសាងស្ថាបនាធ្វើដោយមន្ទីរសាធារណ:ការ និងដឹកជញ្ជូនខេត្តកំពង់ចាម ផ្ដល់ជូនបងប្អូនប្រជាជនដែលរស់នៅ ក្នុងមូលដ្ឋានឃុំព្រែកតានង់ ស្រុកកោះសូទិន។ ក្រោមការដឹកនាំរបស់រាជរដ្ឋាភិបាលកម្ពុជាដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រី សម្តេចបានខិតខំប្រឹងប្រែងកសាងនូវរាល់ការលំបាករបស់ប្រជាពលរដ្ឋ តាមមូលដ្ឋានឲ្យកាន់តែរីកចម្រើន និងការអភិវឌ្ឍន៍ទៅមុខទៀត។ ផ្លូវថ្នល់ គឺជាសរសៃឈាមនៃសេដ្ឋកិច្ចជាតិនិងសេដ្ឋកិច្ចគ្រួសារ មានផ្លូវ មានក្តីសង្ឃឹម ហើយមានសារៈសំខាន់ណាស់សម្រាប់ បងប្អូនប្រជាពលរដ្ឋភូមិព្រែកតានុង បង្កលក្ខណៈងាយស្រួល ក្នុងការទំនាក់ទំនងគ្នា ងាយស្រួលដឹកកសិផលទៅ កាន់ទៅផ្សារ ក៍ដូចជាជួយសម្រួលក្នុងការធ្វើដំណើររបស់ប្រជាពលរដ្ឋនិងសិស្សានុសិស្សទៅកាន់សាលារៀនផងដែរ ។
ឯកឧត្តម បានស្នើសូមដល់ប្រជាពលរដ្ឋ សូមអធ្យាស្រ័យក្នុងដំណើរការកសាងផ្លូវបេតុងនេះ ប្រសិនបើមានផលប៉ះពាល់ក្នុងជីវភាពរស់នៅប្រចាំថ្ងៃ ព្រោះនាពេលខាងមុខនឹងទទួលបានផ្លូវបេតុងថ្មីប្រើប្រាស់ហើយ។
ឯកឧត្តម បានក្រើនរំលឹកដល់បងប្អូនប្រជាពលរដ្ឋទាំងអស់ថា ដើម្បីរក្សាភាពសុខសាន្ត រុងរឿងរបស់យើង ដូចនេះយើងត្រូវរួមគ្នារក្សា ឲ្យបាននូវសន្តិភាព ដើម្បីបន្តអភិវឌ្ឍន៍ប្រទេសរបស់យើងបន្តទៀត កុំឲ្យជឿនូវពាក្យញុះញង់របស់ក្រុមមនុស្សមួយចំនួន ដែលមានគោលបំណងបំផ្លាញនូវលទ្ធិប្រជាធិបតេយ្យនិងសន្តិភាពនៅ កម្ពុជា តាមរយៈមិនឲ្យប្រជាពលរដ្ឋទៅបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃខាងមុខ ឯកឧត្តម បានអំពាវនាវដល់ប្រជាពលរដ្ឋ សូមអញ្ជើញទៅចូលរួមបោះឆ្នោត នាថ្ងៃទី២៩ កក្កដា ឆ្នាំ២០១៨ខាងមុខនេះ ឲ្យបានគ្រប់ៗគ្នា ដើម្បីជ្រើសរើសមេដឹកនាំដែលមានសមត្ថភាពក្នុងការអភិវឌ្ឍន៍ប្រទេសជាតិអោយកាន់តែរីកចម្រើន ។
