ថ្ងៃចន្ទ ១០រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ០៦ ខែសីហា ឆ្នាំ ២០១៨ នេះ មន្ត្រីជំនាញ តំណាងក្រសួងធនធានទឹក និងឧតុនិយម និងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ និងវាយតម្លៃ ការងារសាងសង់ឡើងវិញទំនប់អាងទឹកតាកុយ (ជំហានទី ៣) ស្ថិតក្នុងខេត្តកំពង់ចាម ។
គួររំលឹកជូនថា ការសាងសង់ឡើងវិញទំនប់អាងទឹក តាកុយ (ជំហានទី ៣) ដែលជាអាងស្តុកទឹកសម្រាប់ស្រោចស្រពស្រូវប្រាំង ស្ថិតភូមិសាស្ត្រស្រុកបាធាយ ខេត្តកំពង់ចាម ត្រូវបានក្រសួងធនធានទឹក និងឧតុនិយម បើកការដ្ឋានដំណើរការអនុវត្ត កាលពីដើមឆ្នាំ ២០១៨ កន្លងទៅ ។ ការងារដែលត្រូវអនុវត្តនៅក្នុងជំហានទី ៣ រួមមាន ៖ សាងសង់ឡើងវិញទំនប់អាងទឹក ប្រវែង ២.៨០០ ម, ចាក់បេតុងជើងទេរទំនប់ ប្រវែង ២.០០០ ម និងសាងសង់សំណង់លូមូល (ទ្វារ១) ចំនួន ០៣ កន្លែង ។ នៅពេលបញ្ចប់ការដ្ឋានជំហានទី ៣ នេះ អាងទឹក តាកុយ នឹងផ្តល់ទឹកស្រោចស្រពបន្ថែមដល់ផ្ទៃដីដំណាំស្រូវប្រាំងប្រមាណ ២១៥ ហិកតា និងដំណាំរួមផ្សំ ១៥ ហិកតា នៅក្នុងឃុំសណ្តែក និងឃុំត្រប់ ស្រុកបាធាយ ។
