ស្ទឹងត្រែង៖ ដោយពិនិត្យឃើញថា កុមារចំនួន ២២៥នាក់ ស្ថិតក្នុងត្រកូលក្រីក្រគ្មានលទ្ធភាពក្នុងការសិក្សា សហគមន៍ជីវិតស្រស់ត្រកាលគ្រប់រដូវ បានជ្រើសរើសយកកុមារទាំងនេះមកជួយបណ្តុះបណ្តាលឱ្យមានចំណេះវិជ្ជា និងអប់រំឱ្យនាំគ្នាស្អប់ខ្ពើមគ្រឿងញៀន ដើម្បីជីវិតមានអនាគតល្អ។
ក្នុងគម្រោងលើកកម្ពស់វិស័យអប់រំ របស់សហគមន៍ជីវិតស្រស់ត្រកាលគ្រប់រដូវ នៅខេត្តស្ទឹងត្រែង នាថ្ងៃទី១៤ ខែកញ្ញា ឆ្នាំ២០១៨នេះ លោក ឡុង លីប៉ូ នាយកប្រតិបត្តិសហគមន៍នេះ បានបញ្ជាក់ថា សហគមន៍ជួយបណ្តុះបណ្តាលកុមារជាង២០០នាក់ ដែលមានវ័យក្រោម១៥ឆ្នាំ ដែលរស់នៅជាមួយឪពុកម្តាយ ខ្វះការបីបាច់ថែរក្សាយកមកឱ្យសិក្សារៀនសូត្រ ផ្តល់អាហាររូបត្ថម្ភ និងអប់រំឱ្យក្លាយជាកូនល្អ សិស្សល្អ នឹងប្រជាពលរដ្ឋល្អនៅក្នុងសង្គម។
លោកបន្តថា នេះជាការគួបផ្សំគ្នាដើម្បីកូនខ្មែរយើងដែលស្ថិតនៅក្នុងត្រកូល មានជីវភាពក្រីក្រ ក្លាយទៅជាដុំគ្រាប់ពេជ្រដ៏ល្អមួយ នៅក្នុងគ្រូសារ និងនៅក្នុងភូមិឃុំរបស់យើង ក្នុងពេលដែលអាជ្ញាធរជាតិប្រយុទ្ធប្រឆាំងគ្រឿងញៀនណែនាំធ្វើឱ្យភូមិសគ្មានគ្រឿងញៀន។
លោក ញាំ ឆ្វេត ប្រជាពលរដ្ឋនៅភូមិរាជានុកូល សង្កាត់/ក្រុងស្ទឹងត្រែង បានគាំទ្រចំពោះការដាស់តឿននេះ ព្រោះបានជម្រុញឱ្យមាតាបីតាគ្រប់រូប ឱ្យបង្កើនកាតព្វកិច្ចអប់រំកូន បង្ហាត់បង្រៀនកូនឱ្យមានចំណេះវិជ្ជាជីវៈត្រឹមត្រូវ កសាងសមត្ថភាពក្នុងការរស់នៅ។
លោកទទួលស្គាល់ថា ការផ្តល់ពហុអប់រំប្រកបដោយសីលធម៌ល្អនេះ ជាថាមពលមួយធ្វើឱ្យអ្នកទន់ខ្សោយ កាន់តែមានភាពទទួលខុសត្រួវក្នុងគ្រួសារ និងបានជួយសង្គមឱ្យមានភាព ល្អប្រសើរ។
លោក មៃខល គ្រូបង្រៀនមកពីប្រទេសអូទ្រីស បានបញ្ជាក់ថា នេះជាការយល់ដឹងល្អ ដែលអាចធ្វើឱ្យសហគមន៍ជីវិតស្រស់ត្រកាលគ្រប់រដូវ ធ្វើដំណើរទៅបានយូរអង្វែង ការពារអនាគតកូនចៅផង និងបានលើកស្ទួយដល់វិស័យអប់រំផង ។
លោកបានបន្តថា អង្គការកុមារសកល នៃប្រទេសអូទ្រីស នៅតែបន្តគាំទ្រផ្នែកស្មារតី និងថវិកាជួយមកសហគមន៍នេះ ដើម្បីផ្តល់លទ្ធភាពជួយកូនចៅប្រជាពលរដ្ឋបានសិក្សារៀនសូត្រមានចំណេះដឹងឆ្លងផុតពីភាពអវិជ្ជា៕
