រាជធានីភ្នំពេញ៖ ពិធីចុះអនុស្សរណៈនៃការយោគយល់គ្នាត្រីភាគី ដើម្បីជំរុញធនធានបច្ចេកវិទ្យាព័ត៌មាន និងទូរគមនាគមន៍កម្ពុជា និងការសម្ពោធកម្មវិធីអភិវឌ្ឍនិស្សិតសាកលវិទ្យាល័យ (USDP)ត្រូវបានរៀបចំឡើងក្នុងគោលដៅអភិវឌ្ឍបុគ្គលដែលមានទេពកោសល្យ និងប៉ិនប្រសប់ ដែលចង់ចូលរួមចំណែកយ៉ាងសកម្មក្នុងការជំរុញកំណើនសេដ្ឋកិច្ចព្រះរាជាណាចក្រកម្ពុជា ក្នុងយុគសម័យឌីជីថល។
ពិធីចុះអនុស្សរណៈនេះត្រូវបានផ្ដល់កិត្តិយសចុះហត្ថលេខាដោយឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិត សារ៉ាក់ ខាន់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងលោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiata នាព្រឹកថ្ងៃអង្គារ ៨រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ នៅសណ្ឋាគារ Raffles Hotel Le Royal។
ក្រុមហ៊ុន Smart បានប្តេជ្ញាវិនិយោគទឹកប្រាក់ ១,៥លានដុល្លារក្នុងកម្មវិធីអាហារូបករណ៍ SmartEdu និងកម្មវិធី (USDP)។ គួរបញ្ជាក់ថា កម្មវិធីអាហារូបករណ៍ SmartEdu ផ្ដោតលើសិស្សបញ្ចប់ថ្នាក់ទី១២ ដែលទទួលបានលទ្ធផលល្អ តែជួបការលំបាកផ្នែកហិរញ្ញវត្ថុ។ កន្លងមកសិស្សចំនួន៣០នាក់ ដែលទទួលបានអាហារូបករណ៍ពីកម្មវិធី SmartEdu ដោយឡែកឆ្នាំ២០១៨នេះ កម្មវិធីនេះនឹងផ្ដល់អាហារូបករណ៍ ដល់សិស្ស២០នាក់បន្ថែមទៀត៕
