ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជានៅថ្ងៃទី២ ខែតុលា ឆ្នាំ២០១៨នេះ បានផ្ញើសារចូលរួមរំលែកទុក្ខជូនលោក ចូកូ វីដូដូ ប្រធានាធិបតីឥណ្ឌូនេស៊ី ចំពោះគ្រោះធម្មជាតិរញ្ជួយដី និងរលកយក្សស៊ូណាមិក នៅក្រុងប៉ាលូ និងដុងខាឡា កាលពីថ្ងៃទី២៨ ខែកញ្ញា កន្លងទៅនេះដោយបណ្តាលឱ្យមានមនុស្សស្លាប់ជិតមួយពាន់នាក់ និងរបួសរាប់រយនាក់ទៀត។
យោងតាមសារលិខិតរបស់សម្តេចតេជោ ហ៊ុន សែន បានថ្លែងថា «ខ្ញុំមានសេចក្តីរន្ធត់យ៉ាងខ្លាំង ដោយបានទទួលដំណឹងអំពីការបាត់បង់ជីវិតប្រជាជនជាច្រើន ហើយរាប់រយពាន់នាក់ផ្សេងទៀត ក៏បានបាត់ខ្លួន និងរងរួបស ក្នុងគ្រោះរញ្ជួយផែនដី និងរលកយក្ស ស៊ូណាមិ (Tsunami) ដែលបានបង្កការបំផ្លិចបំផ្លាញដ៏ធំនៅទីក្រុងប៉ាលូ (Palu) កោះស៊ូឡាវេស៊ី (Sulawesi) នាចុងសប្តាហ៍នេះ»។
ដោយឡែកឯកអគ្គរាជទូតកម្ពុជាប្រចាំនៅប្រទេសឥណ្ឌូនេស៊ីវិញកាលពីថ្ងៃទី១ ខែតុលាម្សិលមិញនេះ ក៏បានចេញសេចក្តីអំពាវនាវដល់ប្រពលរដ្ឋខ្មែរដែលរស់នៅប្រទេសឥណ្ឌូនេស៊ីផងដែរ ដោយហាមប្រាមមិនឲ្យប្រជាពលរដ្ឋទាំងនោះ ទៅកាន់តំបន់គ្រោះថ្នាក់ទាំងនោះប្រសិនបើគ្នាការចាំបាច់អ្វីទេនោះ។
សូមរំលឹកថាកាលពីថ្ងៃទី២៨ ខែកញ្ញា ឆ្នាំ២០១៨កន្លងទៅថ្មីៗនេះមានមនុស្សស្លាប់ជាបន្តបន្ទាប់ដោយសារតែគ្រោះរញ្ជួយដី និងរលកយក្សស៊ូណាមិ នៅខេត្តស៊ូឡាវ៉េស៊ី (Sulawesi) ភាគកណ្តាលប្រទេសឥណ្ឌូនេស៊ី។ បើតាមការបញ្ជាក់ពីប្រព័ន្ធផ្សព្វផ្សាយនានាបានឲ្យដឹងថា រហូតមកដល់ថ្ងៃទី១នេះមានមនុស្សស្លាប់កើនឡើងដល់៨៣២នាក់ និងរងរបួសកើនឡើងដល់ ៥៤០នាក់ និងបាត់ខ្លួនជាច្រើននាក់ទៀត។ ក្រោយមានការរញ្ជួយដីដ៏រន្ធត់នេះ រដ្ឋាភិបាល នៃប្រទេសឥណ្ឌូនេស៊ី ក៏បានអំពាវនាវសុំការជួយពីអន្តរជាតិ និងប្រទេសជាមិត្តមួយចំនួនផងដែរ៕
