អគ្គស្នងការនគរបាលជាតិ និងនគរបាលសហព័ន្ធអូស្ត្រាលី បានសន្យាបន្តបង្ក្រាបឧក្រិដ្ឋកម្ម ឆ្លងដែននិងគ្រឿងញៀនរួមគ្នាឲ្យកាន់តែល្អប្រសើបន្ថែមទៀត ខណៈប្រតិបត្តិការួមគ្នាកន្លងទៅ បានល្អប្រសើរ និងចាប់បានឧក្រិដ្ឋជនជាច្រើននាក់ ។
ការសន្យារបស់ភាគីទាំងពីរ គឺបានធ្វើឡើងនៅក្នុងកិច្ចជំនួបមួយរវាងឯកឧត្តមនាយ ឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិជាមួយអ្នកស្រី Naomi Binstead មន្ត្រីសម្របសម្រួលជាន់ខ្ពស់នគរបាលប្រចាំស្ថានទូតអូស្ត្រាលីនៅកម្ពុជា នាព្រឹកថ្ងៃទី២២ ខែតុលា ឆ្នាំ២០១៨នេះនៅអគ្គស្នងការដ្ឋាននគរបាលជាតិកម្ពុជា។
ថ្លែងនៅក្រោយកិច្ចជំនួបពិភាក្សានោះ ឯកឧត្តមនាយឧត្តមសេនីយ៍ ម៉ក់ ជីតូ បានលើក ឡើងថានគរបាលសហព័ន្ធអូស្ត្រាលី បានសន្យានឹងបន្តផ្តល់នូវសម្ភារៈសម្រាប់ពិនិត្យ គ្រឿង ញៀនដល់អគ្គស្នងការនគរបាលជាតិមួយចំនួនទៀតសម្រាប់ពិនិត្យនៅតាមច្រកនានា ហើយ ក៏នឹងផ្តល់នូវវគ្គបណ្តុះបណ្តាលជំនាញ់ដល់មន្ត្រីនគរបាលកម្ពុជាបន្ថែមទៀត ក្នុងការស៊ើបអង្កេតនូវបទឧក្រិដ្ឋឆ្លងដែន និងគ្រឿងញៀនជាដើមទៀតផងដែរ។
ឯកឧត្តម បានបន្តថា«នៅក្នុងកិច្ចជំនួបនោះភាគីអូស្ត្រាលីបានកោតសរសើរចំពោះកង កម្លាំងនគរបាលកម្ពុជាដែលបានសហការជាមួយកម្លាំងរបស់គេអស់រយៈពេលបីឆ្នាំកន្លងទៅនេះក្នុងការទប់ស្កាត់ និងបង្ក្រាបនូវបទឧក្រិដ្ឋកម្មឆ្លងដែនផ្សេងៗ ហើយអូស្ត្រាលី បានអរគុណដល់កម្ពុជាដែលបានផ្លាស់ប្ដូរនូវចារកម្មជាមួយគ្នានាពេលកន្លងមក។ភាគីអូស្ដ្រាលី រំពឹងថា កិច្ចសហប្រតិបត្តិការនេះនឹងប្រកបដោយភាពរលូនជាងមុនទៀតនៅពេលខាងមុខនេះ»។
ថ្លែងនៅក្នុងកិច្ចជំនួបនោះដែរ អ្នកស្រី Naomi Binstead បានកោតសរសើរចំពោះរាជរដ្ឋាភិបាលកម្ពុជា ដែលបានដាក់នូវគោលនយោបាយបង្ក្រាបគ្រឿងញៀន កាលពីឆ្នាំកន្លងទៅដោយគោលនយោបាយនេះ បានប្រព្រឹត្តទៅប្រកបដោយប្រសិទ្ធភាពបំផុត និងធ្វើការចាប់ខ្លួន ឧក្រិដ្ឋជនគ្រឿងញៀនរហូតដល់ជាងមួយម៉ឺនពីរពាន់នាក់ និងរឹបអូសបានគ្រឿងញៀនជាង ប្រាំរយគីឡូក្រាមដែរនោះ។
យ៉ាងណាក៏ដោយនៅក្នុងកិច្ចជំនួបនោះភាគីទាំងពីររំពឹងថា កិច្ចសហប្រតិបត្តិការរួមគ្នា នាពេលខាងមុខរវាងកងកម្លាំងនគរបាលកម្ពុជា និងកងកម្លាំងនគរបាលសហព័ន្ធអូស្ត្រាលីនាពេលខាងមុខនេះ នឹងកាន់តែមានប្រសិទ្ធភាពបន្ថែមទៀត ក្នុងការទប់ស្កាត់និងបង្ក្រាបនូវរាល់ បទល្មើសទាំងនោះ៕