ភ្នំពេញ៖ ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ក្រោយពេលដែលរដ្ឋសភាជាតិ បានអនុម័តវិសោធនកម្មច្បាប់ ស្តីពី គណបក្សនយោបាយដើម្បី បើកផ្លូវឲ្យអ្នកជាប់បម្រាមនយោបាយ បានធ្វើនយោបាយឡើងវិញ ទណ្ឌិតសម រង្ស៊ី មានការភិតភ័យយ៉ាងខ្លាំងខ្លាចបាត់បង់តួនាទីកាងរបស់ខ្លួននិងខ្លាចស្ថិតនៅ ឯកោតែម្នាក់ឯងក៏ប្រើឧបាយកល ប្រកាសមិនចរចា ជាមួយសម្តេចតេជោ ហ៊ុន សែន ឡើយដោយទុកឲ្យសម្តេចចរចា ជាមួយអន្តរជាតិចុះ ប៉ុន្តែក្រោយខ្នង សម រង្ស៊ីលួចវាយតាមធ្វីតធ័ររបស់ខ្លួនមក ទាក់ទងជាមួយ សម្តេចតេជោហ៊ុន សែន សុំចរចាក្នុងនាម១១៨នាក់ ។
ឯកឧត្តម សុខ ឥសាន បានសរសេរក្នុងបណ្ដាញទំនាក់ទំនង សង្គមតេឡេក្រាម នៅថ្ងៃទី១៧ ធ្នូនេះថា”
ការប្រកាសនេះរបស់ ទណ្ឌិតសម រង្ស៊ី គឺដើម្បីបំភាន់ភ្នែកអ្នកគាំទ្រ ខ្លួនផង និងជនបរទេសផង ឲ្យគេយល់ថាសម រង្ស៊ីនៅតែ មានតួនាទីជាតំណាងមន្ត្រី បក្សប្រឆាំងទាំង ១១៨នាក់ ហើយខ្លួនមានតួនាទីដោះស្រាយ បញ្ហាជំនួសមុខ១១៨នាក់នេះបាន។ ប៉ុន្តែ នៅពីក្រោយឆាក ទណ្ឌិតសម រង្ស៊ី បានលួចវាយតាមធ្វីតធ័រ របស់ខ្លួន មកទាក់ទងជាមួយ សម្តេចតេជោហ៊ុន សែន សុំចរចាជាមួយ សម្តេច ក្នុងនាម១១៨នាក់”។
ឯកឧត្តម សុខ ឥសាន បានឲ្យដឹងបន្ថែមថា “នេះជាឧបាយកលនយោបាយ ភូតកុហក់ របស់ទណ្ឌិតសម រង្ស៊ីដែលបង្ហាញច្បាស់ នៅលើគោកលិបបាត់តែក្បាលតែគូថនៅលើគោក ដែលអ្នកណាក៏ដឹងដែរ។ សម រង្ស៊ីប្រកាសចំហរថាមិនចរចាជាមួយសម្តេចហ៊ុន សែន ធ្វើបែបគ្រាន់បើ តែទណ្ឌិតរូបនេះលួចទាក់ទង ជាសម្ងាត់មកសម្តេចដើម្បី ខ្លាចបាត់តួនាទីជាតំណាងឲ្យ១១៨នាក់។ ប៉ុន្តែទោះទណ្ឌិតសម រង្ស៊ីប្រើល្បិចយ៉ាងណា ក៏មិនអាចបិទបាំងឧបាយកលលើ គោករបស់ខ្លួនបានដែរ។ ឧបាយកលនេះបានបែកធ្លាយ ជាសាធារណៈរួចហើយ ហើយសម្តេចតេជោក៏បាប្រកាសរួចហើយ ដែរថាច្បាប់វិសោធនកម្មច្បាប់ស្តីពីគណបក្សនយោបាយ មិនមែនសំដៅបម្រើឲ្យតែក្រុមណា “បុគ្គលណាមួយនោះទេ គឺមានអានុភាពអនុវត្តសម្រាប់ គ្រប់អ្នកនយោបាយ និងគ្រប់គណបក្សនយោបាយ ។ ហេតុនេះទណ្ឌិតសមរង្ស៊ីមិនមានមុខស្អី ត្រូវមកកាងអ្នកនយោបាយ ដទៃបានឡើយ”៕