កម្ពុជាកំពុងត្រៀមរៀបចំធ្វើជាម្ចាស់ផ្ទះ កិច្ចប្រជុំលើកទី៧នៃគណៈកម្មាធិការរួមសម្រាប់អនុវត្តកិច្ចព្រម ព្រៀងដឹកជញ្ជូនឆ្លងកាត់ព្រំដែន ក្រោមក្របខ័ណ្ឌមហាអនុតំបន់មេគង្គដែលនឹងប្រព្រឹត្តទៅនៅថ្ងៃទី១២ ដល់ ១៣ខែមីនា ឆ្នាំ២០១៩ នៅទីក្រុងសៀមរាប ខេត្តសៀមរាប ។
រដ្ឋមន្ត្រីស្តីទីក្រសួងសាធារណការ និងដឹកជញ្ជូន ឯកឧត្តម តូច ចាន់កុសលបានឲ្យដឹងនៅក្នុងកិច្ចប្រជុំពិភាក្សា ត្រៀមលក្ខណៈរៀបចំកិច្ចប្រជុំលើកទី៧ នៃគណៈកម្មាធិការរួមអនុវត្តការងារដឹកជញ្ជូនឆ្លងកាត់ព្រំដែន ក្នុងក្របខ័ណ្ឌមហាអនុតំបន់មេគង្គ (GMS-CBTA) ថ្ងៃទី២១ ខែកុម្ភៈ ឆ្នាំ២០១៩ ម្សិលមិញនេះ បានស្នើឱ្យសមាជិកសមាជិកានៃអង្គ ប្រជុំទាំងអស់ផ្តល់ធាតុចូលសំខាន់ៗ និងជជែកពិភាក្សាលម្អិតលើការបែងចែកការទទួលខុសត្រូវ ដើម្បីត្រៀមរៀបចំកិច្ចប្រជុំលើកទី៧ នៃគណៈកម្មាធិការរួមអនុវត្តការងារដឹកជញ្ជូនឆ្លងកាត់ព្រំដែនក្នុងក្របខ័ណ្ឌ មហាអនុតំបន់មេគង្គឱ្យមានភាពរលូន។
ឯកឧត្តមបន្តថា “កិច្ចប្រជុំត្រៀមនេះ នឹងសម្រេចបាននូវការប្រកាសសុពលភាពនៃការបង្កើតសមាសភាព គណៈកម្មការក្រសួងសម្រាប់ត្រៀមរៀបចំធ្វើជាម្ចាស់ផ្ទះ ដោយមានការកំណត់នូវតួនាទី និងភារកិច្ចទទួលខុសត្រូវច្បាស់លាស់ នៃសមាជិកសមាជិកាគ្រប់រូបរបស់គណៈកម្មការនេះ”។
កម្ពុជានឹងទទួលធ្វើជាម្ចាស់ផ្ទះក្នុងការរៀបចំ និងធ្វើជាប្រធានបន្តវេនតាមលំដាប់ អក្សរឡាតាំងនូវកិច្ចប្រជុំលើកទី៧ នៃគណៈកម្មាធិការរួមសម្រាប់អនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន ក្រោមក្របខ័ណ្ឌមហាអនុតំបន់មេគង្គ និងកិច្ចប្រជុំគណៈកម្មាធិការជាតិសម្រួលការដឹកជញ្ជូនឆ្លងដែន ដែលគ្រោងនឹងប្រព្រឹត្តទៅនៅថ្ងៃទី១២ ដល់១៣ ខែមីនា ឆ្នាំ២០១៩ នៅទីក្រុងសៀមរាប ខេត្តសៀមរាប៕