រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី នឹងអញ្ជើញមកដល់កម្ពុជានៅសប្តាហ៍ក្រោយ ដើម្បីបំពេញទស្សនកិច្ចចំនួន ២ថ្ងៃ។
យោងតាមក្រសួងការបរទេស ដំណើរទស្សនកិច្ចរវាងពីថ្ងៃទី១៣ ដល់ ១៤ ខែមករា របស់ ឯកឧត្តម Peter Szijjarto គឺដើម្បីពង្រឹង និងពង្រីកបន្ថែមទៀត នូវទំនាក់ទំនងជាប្រពៃណីដែលមានស្រាប់ និងកិច្ចសហប្រតិបត្តិការល្អ លើគ្រប់វិស័យរវាងប្រទេសទាំង២ ។
ឯកឧត្តម Peter Szijjarto នឹងអញ្ជើញជួបសម្តែង ការគួរសមចំពោះ សម្តេចអគ្គមហាសេនាបតីតេជោ ហ៊ុនសែន… ជួបពិភាក្សាទ្វេភាគីជាមួយនឹង ឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស…និងជួបពិភាក្សាការងារជាមួយនឹង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម ។
ឯកឧត្តម Peter Szijjarto ក្នុងដំណើរទស្សនកិច្ច ក៏នឹងអញ្ជើញទស្សនាអគារពាណិជ្ជកម្មមេគង្គកម្ពុជា-ហុងគ្រីផងដែរ ។ ដំណើរទស្សនកិច្ចរបស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី នៅសប្តាហ៍ក្រោយនេះ គឺនៅបន្ទាប់ពីដំណើរទស្សនកិច្ចរបស់ប្រធានសភា នៃប្រទេសហុងគ្រី ឯកឧត្តម Laszlo Kover កាលពីដើមខែវិច្ឆិកា ឆ្នាំ ២០១៥ កន្លងទៅ ។
បើយោងតាមប្រសាសន៍របស់ប្រធានសភាហុងគ្រី ដំណើរទស្សនកិច្ចរបស់ ឯកឧត្តមរដ្ឋមន្ត្រី Peter Szijjarto នៅកម្ពុជានៅសប្តាហ៍ក្រោយនេះ នឹងមានចុះហត្ថលេខាលើកិច្ចព្រមព្រៀងនានា ពាក់ព័ន្ធវិស័យពាណិជ្ជកម្ម និងទេសចរណ៍ផងដែរ ។
