ភ្នំពេញ៖ ថ្ងៃទី២២ ខែមេសា ឆ្នាំ២០១៩ រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិបានសម្តែង នូវសមានទុក្ខដ៏ក្រៀមក្រំចំពោះរដ្ឋាភិបាល និងប្រជាជនស្រីលង្កា ជាពិសេសគ្រួសារនៃជន រងគ្រោះដែលបានបាត់បង់ជីវិតនៅក្នុងការវាយប្រហារដោយគ្រាប់បែកដ៏គួរឱ្យស្អប់ខ្ពើម និងរន្ធត់លើវិហារគ្រីស្តសាសនា និងសណ្ឋាគារ នៅប្រទេស ស្រីលង្កា កាលពីថ្ងៃទី ២១ ខែ មេសាឆ្នាំ២០១៩កន្លងមក។ នេះបើយោងតាមសេចក្ដីថ្លែងការណ៍របស់ក្រសួងការបរទេស និង សហប្រតិបត្តិការអន្តរជាតិ។
ក្នុងសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ នៅ ថ្ងៃទី ២២ ខែមេសា ឆ្នាំ ២០១៩នេះ បានលើកឡើងថា រាជរដ្ឋាភិបាលកម្ពុជាថ្កោលទោសយ៉ាងខ្លាំងក្លាចំពោះអំពើហិង្សាដ៏សាហាវឃោរឃៅនេះ ហើយទង្វើបង្កឱ្យមានការភ័យ ខ្លាច និង ជ្រុលនិយមដ៏គួរឱ្យស្អប់ខ្ពើមនេះ នឹងមិនត្រូវអត់ឱនឱ្យជាដាច់ខាត។ សេចក្ដីថ្លែងការណ៍បន្ដថា ព្រះរាជាណាចក្រកម្ពុជាប្តេជ្ញាចិត្តក្នុងការប្រយុទ្ធប្រឆាំងនឹងអំពើភេរវកម្ម និងជ្រុលនិយមតាមគ្រប់ទម្រង់ និងរូបភាព។
ជាមួយគ្នានេះដែរ រាជរដ្ឋាភិបាល និងប្រជាជនកម្ពុជា មានជំហរសាមគ្គីភាពជាមួយរដ្ឋាភិបាល និងប្រជាជនស្រីលង្កា នៅក្នុងគ្រាដ៏លំបាកនេះ និងសូមបួងសួងឱ្យអ្នករងរបួសទាំងអស់ បានជាសះស្បើយឆាប់រហ័សឡើងវិញ៕