សហគមន៍ខ្មែរនៅសហរដ្ឋអាមេរិក បានប្រារព្ធពិធីបុណ្យខួបលើទី៣៧ នៃថ្ងៃជ័យជំនះ ៧មករា ដែលមានអ្នកចូលរួមជិត ៤០០នាក់ ។ ពិធីនេះត្រូវបានគេធ្វើនៅទីក្រុងឡូវ៉ែល រដ្ឋម៉ាសាឈូសេត កាលពីចុងសប្តាហ៍មកនេះ និងក៏មានការរៀបចំជាហូរហែតាមរដ្ឋដទៃៗទៀតផងដែរ ។
មនុស្សទាំង ៤០០នាក់ ដែលចូលរួមមានខ្លះមកពីរដ្ឋ Rhode Island… ក្រុង លីន, ក្រុង រីវ័រ និងប្រជាពលរដ្ឋក្នុងទីក្រុង ឡូវ៉ែល រដ្ឋម៉ាសាឈូសេត ក្រោមអធិបតីភាពអភិបាលក្រុងថ្មី, និងមានវត្តមានកុងស៊ុលកិត្តិយស លោក អ៊ូ សុវណ្ណ និងក៏មានការចូលរួមពីក្រុមយុវជន១៥៧ ពីប្រទេសកម្ពុជាជាច្រើននាក់ផងដែរ ។ ដោយឡែកអតីតអ្នកគាំទ្រគណបក្សសង្រ្គោះជាតិខ្លះ ក៏គេបានឃើញមកចូលរួមផងដែរ ។
ក្រុងឡូវ៉ែលរដ្ឋម៉ាសាឈូសេត គឺជាក្រុងនៃសហគមន៍ខ្មែរធំទី២ ក្នុងសហរដ្ឋអាមេរិក បន្ទាប់ពីសហគមន៍ខ្មែរក្នុង ក្រុងឡុងប៊ិច រដ្ឋកាលីហ្វ័រនីញ៉ា ។ ក្រុងឡូវ៉ែល គឺជាក្រុងនៃសហគមន៍ខ្មែរមួយ ដែលមានការរស់នៅចម្រុះ ទាំងអ្នកគាំទ្រគណបក្សប្រជាជនកម្ពុជា… អ្នកគាំទ្រគណបក្សសង្រ្គោះជាតិ និងគណបក្សនយោបាយដទៃទៀតផងដែរ ។ ស្មារតី ៧មករា នៅក្រៅប្រទេស ត្រូវគេឃើញថា បានទទួលស្គាល់ពីសាធារណជនជាច្រើន ដែលនិយាយថា ជាទិវាជួយរំដោះជីវិតប្រជាជនខ្មែរ អោយរួចចាកផុតពីរបបប្រល័យពូជសាសន៍ខ្មែរក្រហម… ប៉ុន្តែក៏មានអ្នកនយោបាយប្រឆាំងខ្លះ ដែលចោទថាទិវា ៧មករា គឺជាការនាំទាហារវៀតណាម ចូលលុកលុយកម្ពុជា បើទោះបីជាទាហារវៀតណាមបានប្រកាសការដកខ្លួន ចេញពីកម្ពុជាកាលពីចុងទសវត្ស ១៩៨០ ក្រោមការឃ្លាំមើលជាអន្តរជាតិនោះក្តី ។
