មណ្ឌលគិរី៖ នាថ្ងៃទី២៨ ខែមេសា ឆ្នាំ២០១៩ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី អមដំណើរដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត លោកមេបញ្ជាការតំបន់ប្រតិបត្តិការសឹករងមណ្ឌលគិរី លោកមេបញ្ជាការរងកងរាជអាវុធហត្ថខេត្ត និងមន្ទីរអង្គភាពជំនាញ ចុះត្រួតពិនិត្យមើលតាមខ្សែបន្ទាត់ព្រំដែន និងចុះសួរសុខទុក្ខដល់កងកម្លាំងដែលឈរជើងតាមបន្ទាត់ព្រំដែន ក្នុងស្រុកពេជ្រាដា ខេត្តមណ្ឌលគិរី។
ឯកឧត្តម អភិបាលខេត្ត បានមានប្រសាសន៍ថា គោលបំណង ដើម្បីចុះពិនិត្យមើលស្ថានភាពព្រំដែនដែលកងវិស្វកម្មបានឈូសឆាយផ្លូវតាមបន្ទាត់ព្រំដែន និងពិនិត្យតាមខ្សែបន្ទាត់ព្រំដែនចន្លោះបង្គោលសីមាលេខ ៤៨-៤៧ នៅតំបន់ព្រំដែនកម្ពុជា-វៀតណាម និងបានចុះសាកសួរសុខទុក្ខដល់កងកម្លាំងប៉ុស្តិ៍នគរបាលការពារព្រំដែនគោកក្បាលដំរី, ប៉ុស្តិ៍ដាក់ជម និងប៉ុស្តិ៍ដាក់ចូរ ថែមទាំងចុះពិនិត្យមើលដីសម្បទានសង្គមកិច្ច សម្រាប់សាងសង់លំនៅដ្ឋានជូនកងកម្លាំងដែលឈរជើងនៅតាមបន្ទាត់ព្រំដែនផងដែរ។
នាឱកាសនោះដែរ ឯកឧត្តម អភិបាលខេត្ត បានឧបត្ថម្ភដល់កងកម្លាំងនគរបាល និងកងកម្លាំងយោធាដែលកំពុងឈរជើងនៅតាមតំបន់ព្រំដែននូវថ្នាំផ្តាសាយ ព្រមទាំងឧបត្ថម្ភថវិកាក្នុងមួយប៉ុស្តិ៍ៗទទួលបានថវិកា១លានរៀល ដោយឡែកលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានពាំនាំនូវថវិកា ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ជូនដល់ប៉ុស្តិ៍នគរបាលការពារព្រំដែនគោកទាំងបីប៉ុស្តិ៍ ដោយក្នុងមួយប៉ុស្តិ៍ៗទទួលបានថវិកា ៤០ម៉ឺនរៀលផងដែរ ៕
