នាល្ងាចថ្ងៃចន្ទ ៣កេីត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹង ថៃ្ងទី៦ ខែឧសភា ឆ្នាំ២០១៩ លោក ហៀង ម៉េង ប្រធាននាយកដ្ឋានវិស្វកម្ម ក្រសួងធនធានទឹក និងឧតុនិយម និងមន្ត្រីបច្ចេកទេស បានចុះពិនិត្យការងារសាងសង់សំណង់ស្ទាក់ទឹកកាត់ស្ទឹងស្ទោង ចំនួន ០២កន្លែង ស្ថិតនៅឃុំម្សាក្រង ស្រុកស្ទោង ខេត្តកំពង់ធំ។ គម្រោងទាំង ០២កន្លែង នេះជាការចង្អុលបង្ហាញរបស់ ឯកឧត្តម លឹម គានហោ រដ្ឋមន្ត្រី ក្រសួងធនធានទឹក និងឧតុនិយម ក្នុងពេលដែល ឯកឧត្តម អញ្ជើញចុះទៅពិនិត្យសភាពទឹក នៅក្នុងស្រុកស្ទោង គោលបំណងនៃការសាងសង់សំណង់នេះ ៖
១. ស្ទាក់ទឹកស្ទឹងស្ទោងត្រង់ចំណុច ឃុំម្សាក្រង ដើម្បីយកទឹក ទៅស្រោចស្រពលើផ្ទៃដីស្រែមួយចំនួនធំ ដែលតែងតែជួបការខ្វះខាតទឹកស្ទើររៀងរាល់ឆ្នាំ។
២. រក្សាទឹកទុកនៅក្នុងពោះស្ទឹង សម្រាប់ប្រើប្រាស់ក្នុងជីវភាពរស់នៅប្រចាំថ្ងៃសម្រាប់ មនុស្ស សត្វ។
៣. ជាស្ពានសម្រាប់ឆ្លងកាត់ពីតំបន់មួយ ទៅតំបន់មួយទៀត។
៤. ជាជម្រកសម្រាប់មច្ឆាជាតិ។
គិតមកដល់ពេលនេះ ការងារសាងសង់អនុវត្តបាន ៖
– សំណង់ធំស្ទាក់ទឹកស្ទឹង អនុវត្តបានចំនួន ៣០%
– សំណង់តូចកាត់ថ្នល់ អនុវតបានចំនួន ៦០%
ក្រោយពេលសាងសង់រួច សំណង់នេះអាចស្ទាក់ ទឹកស្ទឹងយកមកស្រោចស្រពលើផ្ទៃដីស្រែរដូវវស្សាចំនួន ៧៥០ហិកតា និងស្រែរដូវប្រាំងចំនួន ៣០០ ហិកតា។
