រដ្ឋាភិបាលតាមរយៈអគ្គនាយកដ្ឋានពន្ធដារ បានប្រមូលពន្ធ-អាករតាមប្រពន្ធគ្រប់គ្រងទិន្ន័យចំណូលអនឡាញ (Online) គ្រប់់ប្រភេទបានចំនួនជាង ១៣៣៥លានដុល្លារអាមេរិក ក្នុងរយៈពេល៥ខែដើមឆ្នាំនេះ កើនឡើង ២៩១,៧៣លានដុល្លារ ស្មើនឹងកំនើន ២៧,៩៤ភាគរយ ធៀបរយៈពេលដូចគ្នាកាលពីឆ្នាំមុន។
ប៉ុន្តែបើគិតសម្រាប់តែខែ ឧសភា ការប្រមូលពន្ឋបានចំនួន ១៨៥,៨៣លានដុល្លារអាមេរិកកើនឡើង៥១,៤៩ លានដុល្លារអាមេរិកស្មើនឹងកំនើន៣៨,៣៣% ។
ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកនៃអគ្គនាយដ្ឋានពន្ធដារបានឲ្យដឹងនៅក្នុងកិច្ចប្រជុំបូកសរុប លទ្ធផលការងារប្រមូលពន្ធខែឧសភា នៅថ្ងៃទី១៣ ខែមិថុនា ឆ្នាំ ២០១៩ នេះ បានជម្រុញបន្ថែមដល់អង្គភាព ឱ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ តែម៉ឺងម៉ាត់ដោយផ្អែកលើទិដ្ឋភាពច្បាប់ ក្នុងការផ្តល់សេវាជូនអ្នកជាប់ពន្ធ ; និងការគ្រប់គ្រងប្រមូលពន្ធនៅកម្ពុជា។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាធ្លាប់ថ្លែងនៅក្នុងក្នពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ (RUPP) កាលពីថ្ងៃទី៣ ខែមិថុនា ឆ្នាំ២០១៩នេះថា ការប្រមូលពន្ធដារ និងពន្ធគយ ក្នុងរយៈពេល៥ខែដំបូង ពោលចាប់ពីខែមករា ដល់ខែឧសភាឆ្នាំ២០១៩នេះ សម្រេចលើសពីផែនការ ដែលរាជរដ្ឋាភិបាល បានគ្រោងទុក។
សម្តេចតេជោថា “ឆ្នាំនេះទោះបីជាកម្ពុជាបង្កើនពិដាននៃប្រាក់ចំណូល ក៏កម្ពុជានៅតែធានាថាផែនការនឹងត្រូវលើស ព្រោះថាបច្ចុប្បន្នវប្បធម៌បង់ពន្ធ នៅក្នុងចំណោមប្រជាពលរដ្ឋរបស់យើងកាន់តែល្អប្រសើរ”៕