តាមរយៈការសម្របសម្រួល និងដឹកនាំដោយទីភ្នាក់ងារលើកកម្ពស់ពាណិជ្ជកម្ម និងការវិនិយោគកូរ៉េប្រចាំនៅកម្ពុជា (KOTRA) ក្រុមហ៊ុនផ្គត់ផ្គង់សម្ភារៈសំណង់ចំនួន២៥នឹងបើកកិច្ចពិភាក្សាការងារ និងស្វែងរកឱកាសវិនិយោគជាដៃគូជាមួយក្រុមហ៊ុនដែលពាក់ព័ន្ធទៅនឹងវិស័យសំណង់នៅកម្ពុជា។
នៅក្នុងវេទិកានៃកិច្ចជំនួបពិភាក្សាការងារ និងឱកាសទទួលបានចំណែកទីផ្សារពីកិច្ចសហការវិនិយោគភាពជាដៃ រវាងក្រុមហ៊ុនផ្គត់ផ្គង់សម្ភារៈសំណង់កូរ៉េទាំង២៥ និងក្រុមហ៊ុនអភិវឌ្ឍក្នុងប្រទេសកម្ពុជា នឹងធ្វើនៅសណ្ឋាគារសូហ្វីតែល ភ្នំពេញ នៅថ្ងៃទី២០ ខែមិថុនា ឆ្នាំ២០១៩ ចាប់ពីម៉ោង ១០ព្រឹក រហូតដល់ដល់ម៉ោង៥ល្ងាច ក្រោមប្រធានបទ «Cambodia-Korea Construction Road Show 2019» តាមរយៈសមាគមសំណង់កម្ពុជា (CCA)។
តាមរយៈវេទិកាមួយនេះ បណ្តាក្រុមហ៊ុនផ្គត់ផ្គង់សម្ភារៈសំណង់កូរ៉េទាំង២៥ មានឱកាសបង្ហាញពីផលិតផលនានារបស់ខ្លួន មកកាន់បណ្តាក្រុមហ៊ុនវិនិយោគ និងអភិវឌ្ឍនានានៅកម្ពុជា ដើម្បីអាចមានឱកាសទទួលបានចំណែកទីផ្សារ ឬចាប់ដៃធ្វើសហប្រតិបត្តិការជាមួយគ្នា ស្របពេលដែលវិស័យសំណង់នៅកម្ពុជា កំពុងតែមានសន្ទុះនិងរីកចម្រើនយ៉ាងខ្លាំង បើប្រៀបធៀបជាមួយបណ្តាប្រទេសក្នុងតំបន់មួយចំនួន។
នៅពេលបច្ចុប្បន្ននេះក្រុមហ៊ុនកូរ៉េ ដែលកំពុងវិនិយោគ និងមានដំណើរប្រតិបត្តិការនៅក្នុងប្រទេសកម្ពុជាមានសរុបច្រើនជាង១៦០០ ក្រុមហ៊ុនលើគ្រប់វិស័យដែលក្នុងនោះ វិស័យសំណង់ និងអចលនទ្រព្យបានដើរតួឈានមុខគេ។
អ្នកវិភាគសេដ្ឋកិច្ចកម្ពុជា លោកង៉ែត ជូ បានបង្ហាញនូវក្ដីសាទរ និងស្វាគមន៍ចំពោះវត្តមានរបស់បណ្តាក្រុមហ៊ុន សាងសង់មកពីប្រទេសកូរ៉េខាងត្បូង។ លោកបានបន្តទៀតថា “វាជារឿងល្អនៅពេលមានរូបភាពបែបនេះ ព្រោះការធ្វើទស្សនកិច្ចសិក្សាអំពីឱកាសវិនិយោគជាដៃគូ វាជាចំណុចចាប់ផ្តើមដ៏ល្អមួយ។
លោកបានបន្តទៀតថា “បច្ចុប្បន្នវិស័យសាងសង់សំណង់ និងអចលនទ្រព្យនៅកម្ពុជា ភាគច្រើនជាការវិនិយោគរបស់ក្រុមហ៊ុនចិន ប៉ុន្តែបើមានក្រុមហ៊ុនមកពីកូរ៉េខាងត្បូង បន្ថែមទៀតវាកាន់តែប្រសើរ និងជម្រុញឱ្យវិស័យមួយនេះរីកចម្រើនខ្លាំង”។ លោកបានបន្តទៀតថា “ប្រទេសកូរ៉េមានបច្ចេកវិទ្យាខ្ពស់ នៅពេលដែលគេចូលមកកាន់កម្ពុជា ក្រៅពីអាចទទួលបានប្រយោជន៍ និងចំណូលបន្ថែមលើសេដ្ឋកិច្ចកម្ពុជា យើងក៏អាចទទួលបានចំណេះដឹងបន្ថែមថ្មីៗពីវិស័យមួយនេះ”។
លោកង៉ែត ជូ បានបន្តថា “វាក៏ជាឱកាសដ៏ល្អសម្រាប់អ្នកវិនិយោគក្នុងស្រុក ក្នុងការចាប់ដៃធ្វើជំនួញឆ្ពោះទៅកាន់ប្រទេសកូរ៉េធ្វើជាដៃគូវិញ”៕
