រដ្ឋាភិបាលតាមរយៈក្រសួងសាធារណៈការ និងដឹកជញ្ជូននឹងចុះហត្ថលេខាលើកិច្ចព្រមព្រៀងស្ថាបនាឡើងវិញនូវផ្លូវជាតិលេខ ២ ជាមួយក្រុមហ៊ុនកូរ៉េនៅថ្ងៃទី២៥ ខែមិថុនា ឆ្នាំ២០១៩ខាងមុខនេះ។
យោងតាមសេចក្តីជូនដំណឹងរបស់ក្រសួងសាធារណៈការ នឹងដឹកជញ្ជូន បានឱ្យដឹងនៅថ្ងៃទី ២៤ខែមិថុនា ឆ្នាំ ២០១៩ នេះថា ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន នឹងអញ្ជើញ ជាអធិបតីភាព នៅក្នុងពិធីចុះហត្ថលេខាលើកិច្ចព្រមព្រៀងគម្រោងធ្វើឱ្យប្រសើរឡើងវិញផ្លូវជាតិលេខ២ (ពីតាខ្មៅ ដល់អូរចំបក់) និងផ្លូវជាតិលេខ២២ (ពីអូរចំបក់ ដល់អង្គតាសោម) រវាងក្រសួងសាធារណការ និងដឹកជញ្ជូន និងក្រុមហ៊ុន HANSHIN Engineering & Construction Co. Ltd ដែលជាគម្រោង ឥណទានសម្បទាន ពីរដ្ឋាភិបាលកូរ៉េ។
គម្រោងផ្លូវជាតិលេខ ២ គ្រោងនឹងចំណាយថវិកាប្រមាណ ៥៦លានដុល្លារអាមេរិក ក្រោមកម្ចីឥណទានពី រដ្ឋាភិបាលកូរ៉េ និងថវិការបដិភាគរបស់រាជរដ្ឋាភិបាលកម្ពុជាប្រមាណ ៨.៥លានដុល្លារអាមេរិក មានប្រវែង ៦៦គីឡូម៉ែត្រ។ នេះបើយោងតាម ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងកាលពីកន្លងមក។
ក្នុងនោះ ចាប់ពីរង្វង់មូលតាខ្មៅ រហូតដល់រង្វង់មូលអូរចំបក់មានប្រវែង ៥៧គីឡូម៉ែត្រ និង ៩គីឡូម៉ែត្រ នៅលើផ្លូវជាតិលេខ ២២ គ្រោងក្រាលកៅស៊ូ AC សង់ស្ពានថ្មី និងពង្រីកទទឹងផ្លូវឲ្យបាន ១៣ម៉ែត្រ តាមទំហំចរាចរណ៍ និងតាមដំណាក់កាល។
រីឯ ចាប់ពីរង្វង់មូលគួរស្រូវ ទៅទិសខាងត្បូងប្រវែង ៨គីឡូម៉ែត្រ គ្រោងនឹងសាងសង់ជា ៤គន្លង។បច្ចុប្បន្នដៃគូអភិវឌ្ឍន៍កូរ៉េ កំពុងជ្រើសរើសទីប្រឹក្សាបច្ចេកទេ ដើម្បីចាប់ផ្តើមរៀបចំ Design និងជ្រើសរើសក្រុមហ៊ុនសាងសង់ ដោយដំណើរការនេះ អាចចំណាយពេល ១ឆ្នាំ ទម្រាំបានអនុវត្តការសាងសង់ជាក់ស្តែង។យ៉ាងណាមិញ ឯកឧត្តម ស៊ុន ចាន់ថុល នឹងស្នើសុំគោលការណ៍ស្វែងរកកញ្ចប់ថវិកាពិសេស ដើម្បីជួសជុលបណ្តោះអាសន្នឲ្យបានទាន់ពេលវេលា មិនរង់ចាំរហូតដល់ ១ឆ្នាំនោះឡើយ។
គម្រោងនេះ នឹងត្រូវចាប់ផ្តើមឲ្យបានលឿន ទាំងយប់ និងថ្ងៃ ដើម្បីកាត់បន្ថយការកកស្ទះ នឹងសម្រួលដល់ចរាចរណ៍ជូនដល់ បងប្អូនប្រជាពលរដ្ឋ៕