គណបក្សសង្គ្រោះជាតិ ដែលកំពុងស្តារវប្បធម៌សន្ទនាជាមួយនឹងគណបក្សប្រជាជនកម្ពុជា បានប្រាប់អ្នកគាំទ្រ សូមបញ្ឈប់ការប្រើពាក្យសម្តីអសីលធម៌ជេរប្រមាថ ក្នុងការបញ្ចេញមតិយោបល់ ។ ការប្រាប់អ្នកគាំទ្រសូមអោយប្រកាន់សីលធម៌ខ្ពស់នេះ បានធ្វើឡើងក្រោយពេលដែលសកម្មជនគណបក្សសង្គ្រោះជាតិជាច្រើន បានប្រើពាក្យប្រមាថតាមការសរសេរ និងការថតរូបវីដេអូ និងសម្លេងប្រើភាសាអសុរោះ មកលើថ្នាក់ដឹកនាំគណបក្សប្រជាជនកម្ពុជា ។
សេចក្តីអំពាវនាវរបស់គណបក្សសង្គ្រោះជាតិថ្ងៃទី១៤ មករានេះ បានសរសេរថា គណបក្សសូមអំពាវនាវសាជាថ្មីដល់ក្រុមដឹកនាំ… សកម្មជន និងអ្នកគាំទ្របក្សសង្គ្រោះជាតិ រក្សាភាពថ្លៃថ្នូរ សីលធម៌ខ្ពស់ ដោយមិនជេរប្រមាថ មិនប្រើរូបភាពប្រមាថក្នុងការបញ្ចេញមតិយោបល់ ឬការរិះគន់តាមប្រព័ន្ធផ្សព្វផ្សាយនានានោះឡើយ ។
ការប្រើពាក្យ និងរូបភាពប្រមាថ និងសម្តីអសុរោះមកលើថ្នាក់ដឹកនាំ គណបក្សប្រជាជនជាបន្តបន្ទាប់នេះ ត្រូវគេសង្ស័យថា គឺជានយោបាយរបស់ក្រុមប្រឆាំង ដែលតែងញុះញង់ចង់អោយមានអំពើហិង្សាកើតឡើង ដើម្បីគណបក្សប្រឆាំងអាចស្វែងរកពិន្ទុនយោបាយ ដាក់ការចោទប្រកាន់មកលើរាជរដ្ឋាភិបាល ។
អំពើញុះញង់រកហិង្សានេះ ត្រូវមេដឹកនាំគណបក្សប្រឆាំង ធ្លាប់ប្រាប់អ្នកគាំទ្រនៅក្រៅប្រទេស ។ ទោះជាយ៉ាងណាក៏ដោយ ល្បិចកលនយោបាយដើម្បីតែស្វែងរកពិន្ទុនយោបាយនោះ មិនដែលទទួលបានជោគជ័យនោះទេ ។
