សម្តេចតេជោនាយករដ្ឋមន្រ្តី ហ៊ុន សែន បានដាក់បញ្ជាតឹងតែងការបង្ក្រាបជំនួញឈើខុសច្បាប់ និងព្រមានដកតំណែងអភិបាលខេត្តត្បូងឃ្មុំ… អភិបាលស្រុកមេមត់… និងមន្ត្រីដឹកនាំការអនុវត្តន៍ច្បាប់ក្នុងខេត្ត ដែលធ្វើគថ្លង់ចំពោះការបំផ្លាញព្រៃឈើខ្មែរនៅទីនោះ ។
ខេត្តត្បូងឃ្មុំ… និងខេត្តមួយចំនួនទៀត ដែលស្ថិតជាប់នឹងព្រំដែនប្រទេសវៀតណាម ត្រូវគេ ឃើញមានការនាំចេញឈើប្រណិត ដែលជាឈើកាប់បំផ្លាញចេញពីព្រៃនៃប្រទេសកម្ពុជាក្រោមការកាងរបស់ឧកញាមួយចំនួន ក្នុងនោះរួមមានៈ ឧកញាឈ្មោះ លឹម ប៊ុនណា ហៅខ្នារ និង ឧកញា សឹង សំអុល ផងដែរ ។
សូមជំរាបថាជំនួញឈើប្រណិត ត្រូវប្រទេសទាំង១០ នៅអាស៊ានបានចាត់ទុកថាជាករណីឧក្រិដ្ឋកម្មឆ្លងដែន ដែលចាំបាច់ត្រូវតែបង្ក្រាប ។ រថយន្តដឹកឈើប្រណិតទាំងខ្សែៗ ត្រូវបានគេរាយការណ៍ថា បានដឹកចេញពីកម្ពុជាទៅវៀតណាម ដោយមិនមានការធ្វើអន្តរាគមន៍ពីមន្ត្រីអនុវត្តច្បាប់ក្នុងខេត្តឡើយ។ ការអាចនាំរថយន្តទាំងខ្សែៗដឹកឈើប្រណិតទាំងនេះ ចេញទៅក្រៅប្រទេសបានដោយគ្មានឧបសគ្គនេះ ត្រូវគេសង្ស័យថាជាការឃុបឃិតមានប្រព័ន្ធក្នុង លក្ខណៈបំផ្លាញប្រទេសជាតិ។ សម្តេចតេជោសែន ត្រូវបានគេដកស្រង់ប្រសាសន៍ក្នុងកិច្ចប្រជុំគណរដ្ឋមន្ត្រី ដែលបញ្ជាអោយមានការបង្ក្រាបឈើប្រណិតខុសច្បាប់ទាំងនោះ និងសម្តេចបានព្រមានប្រសាសន៍បង្ហាញឈ្មោះឧកញាសង្ស័យខ្លះដែលបានកាងឈើខុសច្បាប់ក្នុងជំនួញរកស៊ីឈើចេញតាមច្រកខេត្តត្បូងឃ្មុំផងដែរ ។
រដ្ឋមន្ត្រីក្រសួងព័ត៌មាន ឯកឧត្តម ខៀវ កាញារីទ្ធ បានមានប្រសាសន៍ក្នុងហ្វេសប៊ុកដកស្រង់ប្រសាសន៍សម្តេចតេជោសែនថា សម្តេចបានចេញបញ្ជាអោយ បិទច្រករត់ពន្ធឈើទៅវៀតណាម និងបានដកស្រង់សម្តីកាសែតដែលលើកឡើងចំឈ្មោះឧកញា លឹម ប៊ុនណា ហៅខ្នា និង ឧកញា ស៊ឹង សំអុល ដែលកាងឈើ ។
សម្តេចបានព្រមានដកអភិបាលខេត្តត្បូងឃ្មុំ ឯកឧត្តម ប្រាជ្ញ ច័ន្ទ និងអភិបាលស្រុកមេ មត់ចេញពីតំណែងថែមទៀត បើសិនជាមិនមានការចាត់វិធានការណ៍បង្ក្រាបឈើប្រណិត ខុសច្បាប់ ដឹកចេញតាមច្រកខេត្តត្បូងឃ្មុំនោះទេ ។
