គណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ បានបន្តសកម្មភាពចុះបង្ក្រាបអំពើអនាធិបតេយ្យព្រៃឈើ តាមខេត្តដែលជាប់នឹងព្រំដែនវៀតណាម បន្ថែមទៀត នៅថ្ងៃទី១៩ មករានេះ ។ សេចក្តីរាយការណ៍ពីមន្ត្រីកងរាជអាវុធហត្ថ បានអោយដឹងថា ប្រធានដឹកនាំគណៈកម្មការជាតិ នាយឧត្តមសេនីយ៍ សៅ សុខា បានដឹកនាំកម្លាំងចុះត្រួតពិនិត្យទីតាំងស្តុកឈើ ១កន្លែង នៅភូមិរលួស ឃុំរលួសមានជ័យ ស្រុកសំបូរ ខេត្តក្រចេះ ។
គួររំលឹកថា កាលពីម្សិលមិញ គណៈកម្មការជាតិដើម្បីទប់ស្តាត់ និងបង្រ្កាបបទលើ្មសព្រៃឈើ បានចុះទៅខេត្តត្បូងឃ្មុំ ដែលនៅទីនោះ គេបានរកឃើញមានឈើពាក់ព័ន្ធនឹងឧកញាចំនួន ៣នាក់ ។ សេចក្តីរាយការណ៍បានអោយដឹងថា ក្នុងខេត្តត្បូងឃ្មុំនោះ ឈើរបស់ ឧកញា សឹង សំអុល ត្រូវគេប្រទះឃើញមានជាង៣ម៉ែត្រគូប… ចំណែកក្នុងឃ្លាំង ឧកញា លឹម ប៊ុនណា ហៅខ្នា មានឈើជាច្រើន ដែលកម្លាំងជំនាញកំពុងវាស់វែងនៅរសៀលថ្ងៃទី ១៩ មករានេះទៀត ។
នៅក្នុងស្រុកអូរាំងឪ នោះវិញ ក្នុងតំបន់កាន់កាប់ក្រុមហ៊ុនរបស់ឧកញាម្នាក់ឈ្មោះ វន្ត ប៊ុនថៃ ត្រូវគេប្រទះឃើញឈើខុសច្បាប់ជាច្រើន ។ មន្ត្រីខេត្តបានអោយដឹងថា ឈើរបស់ ឧកញា វន្ត ប៊ុនថៃ ដែលសុទ្ធតែជាឈើមូល ត្រូវបានគេដុតបំផ្លាញភស្ថុតាង… ចំណែកឈើខ្លះត្រូវបានគេជីករណ្តៅធំៗចំនួន២ បានកប់… ចំណែកឈើដែលកប់មិនទាន់ ត្រូវគេប្រទះឃើញរណូករណែកពាសពេញនៅទីនោះ ។ សមត្ថកិច្ចកំពុងធ្វើកិច្ចការទាំងឡាយនោះ តាមនីតិវិធីពេលនេះ ។
នៅក្នុងខេត្តត្បូងឃ្មុំដដែលនោះផងដែរ ដើម្បីស្វែងរកកិច្ចសហប្រតិបត្តិការពីប្រជាពលរដ្ឋ ដើម្បីចូលរួមការបង្រ្កាបគណៈកម្មការជាតិ បានរៀបចំមណ្ឌលប្រតិបត្តិការ ២៤ម៉ោង លើ ២៤ម៉ោង ដើម្បីទទួលព័ត៌មានអំពីបទល្មើសព្រៃឈើ ។ គណៈកម្មការជាតិដើម្បីទប់ស្កាត់ និងបង្រ្កាបបទល្មើសព្រៃឈើ បានអំពាវនាវដល់ប្រជាពលរដ្ឋនិងអ្នកសារព័ត៌មាន សូមអោយចូលរួមសហការផ្តល់ព័ត៌មានអំពីបទល្មើសព្រៃឈើតាមទូរស័ព្ទ ០២៣ ៦៦៦៧៦៦៧… លេខ ០២៣ ៦៣៦៧៣៦៧… និងលេខ ០២៣ ៦៦៦៨៦៦៨ ផងដែរ ។
