សម្តេចតេជោ ហ៊ុន សែន៖ ក្រុមប្រឆំាងមកតវ៉ានៅកូរ៉េ មានចំនួនតិចតួច តឹកឡឹកៗ គឺតិចជាងអ្នកគាំទ្រសម្តេច


(សេអ៊ូល)៖​​​ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី៣ ខែកុម្ភៈ ឆ្នាំ២០២០នេះ បានមានប្រសាសន៍ថា​​​ ក្រុមអ្នកឆាំងជ្រុលនិយម ដែលតវ៉ាប្រឆាំងនឹងវត្តមានសម្តេចនៅលើទឹកដីបរទេស គឺតែងតែតិចជាងចំនួនអ្នកស្រលាញ់គាំទ្រសម្តេច។

សម្តេចតេជោ នាយករដ្ឋមន្ត្រី បានមានប្រសាសន៍បែបនេះ ក្នុងឱកាសជួបសំណេះសំណាលជាមួយប្រជាពលរដ្ឋខ្មែរ ដែលរស់នៅ និងធ្វើការក្នុងប្រទេសកូរ៉េខាងត្បូង នៅឯសណ្ឋាគារ ទីក្រុងសេអ៊ូល ប្រទេសកូរ៉េខាងត្បូង។

សម្តេចតេជោ ហ៊ុន​​​ សែន បានបញ្ជាក់ថា «មហាបាតុកម្មរបស់ពួកប្រឆាំងម្សិលមិញ គេដូចជាស្រែកតគ្នា តឹកឡឹកៗ តែប៉ុន្មាននាក់។ ម្សិលមិញគួរតែមានមនុស្សច្រើន។ តែមកប៉ុណ្ណឹង មកធ្វើអី។ ទៅអាមេរិក អ្នកគាំទ្រ ហ៊ុន សែន ច្រើនជាង។ នៅប៊ែលហ្ស៊ីក, នៅបារាំង និងនៅស្វីស អ្នកគាំទ្រ ហ៊ុន សែន ក៏ច្រើនជាង»។

សម្តេចតេជោនាយករដ្ឋមន្ត្រី បានអញ្ជើញដល់ទីក្រុងសេអ៊ូល សាធារណរដ្ឋកូរ៉េ ដោយសុវត្ថិភាព នារសៀលថ្ងៃទី៣ ខែកុម្ភៈ ឆ្នាំ២០២០ នេះ ដើម្បីចូលរួមកិច្ចប្រជុំកំពូលពិភពលោក ឆ្នាំ២០២០ នៃអង្គការសហព័ន្ធសន្តិភាពសកល ស្តីពីសន្តិភាព សន្តិសុខ និងការអភិវឌ្ឍមនុស្ស។

ពិធីប្រជុំកំពូលនេះ គ្រោងប្រារព្ធធ្វើនៅរដ្ឋធានីសេអ៊ូល ពីថ្ងៃទី០៣-០៥ ខែកុម្ភៈ ឆ្នាំ២០២០ ហើយក្នុងឱកាសនេះដែរ សម្តេចតេជោនាយករដ្ឋមន្ត្រីនឹងជួបពិភាក្សាការងារជាមួយ លោក មូន ចេអ៉ីន (Moon Jae-in) ប្រធានាធិបតីកូរ៉េខាងត្បូង និងនាយករដ្ឋមន្រ្តី ព្រមទាំងមន្រ្តីសំខាន់ៗជាច្រើនរូបទៀត ដើម្បីពង្រឹង និងពង្រីកកិច្ចសហប្រតិបត្តិការទ្វេភាគី កម្ពុជា-កូរ៉េ ឲ្យកាន់តែល្អប្រសើរឡើង។

មុនចេញដំណើរពីរាជធានីភ្នំពេញ នាព្រឹកមិញនេះ សម្តេចតេជោ ហ៊ុន សែន សរសេរសារនៅលើហ្វេសប៊ុក នាព្រឹកនេះថា «កិច្ចប្រជុំនេះក៏នឹងជួយជួយសម្រួលដល់ការរស់នៅ និងលក្ខខណ្ឌការងាររបស់កូនក្មួយនៅកូរ៉េឲ្យបានល្អប្រសើរឡើងថែមទៀត»៕