ប្រតិបត្តិការបង្ក្រាបបទល្មើសព្រៃឈើខុសច្បាប់ បានបន្តនៅថ្ងៃទី២០ មករានេះទៀត ដោយកម្លាំងបានចុះទៅពិនិត្យឃ្លាំងស្តុកឈើឧកញាទ្រីភាព និងក្រុមហ៊ុនវារីអគ្គីសនីសេសានក្រោម២ ក្នុងខេត្តស្ទឹងត្រែង ។
មិនមានសេច ក្តីរាយការណ៍អំពីភាពមិនប្រក្រតី ក្នុងការចុះទៅពិនិត្យក្នុងខេត្តស្ទឹងត្រែង នោះទេ បើទោះបីជាមានសេចក្តីរាយការណ៍ អំពីការប្រទះឃើញឈើប្រណិតជាច្រើនក្នុងទីតាំង ២កន្លែង របស់លោកឧកញាទ្រីភាពនោះក៏ដោយ ។
សេចក្តីរាយការណ៍បានសរសេរថា ក្នុងទីតាំងរបស់លោកឧកញាទ្រីភាព នៅក្នុងខេត្តស្ទឹងត្រែងនោះ មានឈើរណូករណែលលើដី គរដូចភ្នំ និងខ្លះកំពុងស្ថិតលើរថយន្តដែលបំរុងដឹកចេញ ។ ដោយឡែកនៅក្នុងខេត្តក្រចេះ… ត្បូងឃ្មុំ និងខេត្តមណ្ឌលគីរី នោះវិញ កម្លាំងសមត្ថកិច្ចនៅតែបន្តការដាក់ពង្រាយតាមកន្លែងឈើ ដែលរកឃើញ និងមិនអនុញ្ញាតអោយដឹកជញ្ជូនចេញឡើយ ដើម្បីធ្វើការរាប់ចំនួនឈើទាំងអស់សាឡើងវិញ។ ដោយសារតែចំនួនឈើ ប្រណិតមានច្រើនពេក ទើបការរាប់ប៉ុន្មានថ្ងៃមកហើយនេះ នៅមិនទាន់បានបញ្ចប់នៅឡើយទេ ។
មន្ត្រីអ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានមានប្រសាសន៍នៅថ្ងៃនេះថា សមត្ថកិច្ចនៅរក្សាភាពដើមនៃចំនួនឈើតាមទីតាំងរកឃើញទាំងអស់ ដោយមិនអោយមានការចល័តដឹកយកចេញទៅទីណាឡើយ និងសមត្ថកិច្ចជំនាញកំពុងពិនិត្យវាស់វែង ជាមួយការផ្ទៀងផ្ទាត់ឯកសារដើម្បីរកម្ចាស់ឈើនិងប្រភពឈើថែមទៀត ។
ឈើដែលរកឃើញនៅខេត្តត្បូងឃ្មុំ ខេត្តក្រចេះនិងខេត្តមណ្ឌលគីរី គឺជាឈើដែលគេបាននិយាយថា ជាប់ទាក់ទងនឹងឈ្មោះឧកញាយ៉ាងហោចចំនួន ៤រូប គឺឧកញាលឹម ប៊ុនណា ហៅខ្នា… ឧកញាសឹង សំអុល… ឧកញ៉ា វន្ត ប៊ុន ថៃ… និងឧកញ៉ាឈ្មោះ វីដា ផងដែរ ។ ជំនួញឈើប្រណិត ត្រូវប្រទេសទាំង១០ នៅអាស៊ាន បានចាត់ទុកថា គឺជាឧក្រិដ្ឋកម្មឆ្លងដែន ដែលត្រូវតែបង្ក្រាប ។
មិនមានសេចក្តីរាយការណ៍បញ្ជាក់ថា តើក្រោយការរកឃើញនេះ សមត្ថកិច្ច នឹងមានវិធានការណ៍តាមផ្លូវច្បាប់ទៀតដែរឬយ៉ាងណា ចំពោះឈ្មួញណាដែលជាប់ជំពាក់ភាពមិនប្រក្រតីនៃជំនួញឈើនោះឡើយ… ប៉ុន្តែមានការបង្ហើបថា សមត្ថកិច្ចនឹងអនុវត្តនិតិវិធីតាមច្បាប់ ប្រសិនណាបើរកឃើញថា ឈើទាំងនោះ បានមកដោយសារការកាប់បំផ្លាញព្រៃខ្មែរដោយគ្មានច្បាប់ទម្លាប់នោះ ។