(ព្រៃវែង)៖ នៅថ្ងៃទី ១០ ខែកុម្ភៈ ឆ្នាំ២០២០ នៅស្រុកកំពុងត្របែក បានបើការដ្ឋានសាងសង់ ផ្លូវក្រាលកៅស៊ូ SBST ប្រវែង ៣,៤៩៧ម៉ែត្រ ក្រោមអធិបតីភាពឯកឧត្តម ជា សុមេធី អភិបាលខេត្ត អមដំណើរដោយមន្ទីរអង្គភាពនានាជុំវិញខេត្ត ប្រជាពលរដ្ឋយ៉ាងច្រើនកុះករ។
នៅក្នុងឱកាសដែលលោក យ៉ាវ សានិន អភិបាលស្រុកកំពង់ត្របែក ក៏បានលើកឡើងថា ផ្លូវនេះពីមុនពិបាកធ្វើដំណើរគួរសម ជាពិសេសនៅពេលរដូវវស្សា។ ដោយការយកចិត្តទុកដាក់ពីរាជរដ្ឋាភិបាលជាមួយ នឹងធនាគារអភិវឌ្ឍន៍ជនបទអាស៊ី (ADB) និងមូលនិធិអន្តរជាតិសម្រាប់ការអភិវឌ្ឍន៍វិស័យកសិកម្ម(I FAD) ក៏បានស្ថាបនាផ្លូវមួយនេះទៅជាផ្លូវក្រៅកៅស៊ូ SBST ដែលមានប្រវែង ៣,៤៩៧ ម៉ែត្រ ទទឹង ៥ ម៉ែត្រ ដែលនៅតាមដងទន្លេកំពង់ត្របែកក្នុងភូមិអន្លង់រាជ្យ រហូតដល់ភូមិបឹងខ្យង ឃុំកំពង់ត្របែក ស្រុកកំពង់ត្របែក ខេត្តព្រៃវែង។
ថ្លែងនៅក្នុងឱកាសនោះដែរឯកឧត្តម ជា សុមេធី អភិបាលខេត្តក៏បានលើកឡើងថា ទាំងនេះគឺជាការយកចិត្តទុកដាក់របស់រាជរដ្ឋាភិបាលក្នុងការអភិវឌ្ឍនូវហេដ្ឋារចនាសម្ព័ន្ធផ្លូវថ្នល់ជូននូវ ប្រជាពលរដ្ឋ ដើម្បីបង្កលក្ខណៈងាយស្រួលក្នុងការដឹកជញ្ជូននូវកសិផលកសិកម្ម របស់បងប្អូនប្រជាពលរដ្ឋ។ និងជួយសម្រួលក្នុងការធ្វើដំណើររបស់បងប្អូនប្រជាពលរដ្ឋ សិស្សានុសិស្ស ពីតំបន់មួយទៅតំបន់មួយពីភូមិមួយ ទៅភូមិមួយ ប្រកបដោយសុវត្ថិភាព។
ឯកឧត្តមក៏សូមផ្ដាំផ្ញើដល់បងប្អូនប្រជាពលរដ្ឋ ទាំងអស់ត្រូវ ចេះថែរក្សានៅផ្លូវមួយខ្សែនេះ ឲ្យបានគង្វង់យូរអង្វែង និងបើកបរត្រូវគោរពច្បាប់ចរាចរណ៍ ដើម្បីកុំឲ្យមានគ្រោះថ្នាក់ចរាចរណ៍បាត់បង់អាយុជីវិតនោះផងដែ។
សូមបញ្ជាក់ផងដែរថា៖ គម្រោងនេះត្រូវបានជ្រើសរើសចេញពីគម្រោងអថិភាព កម្មវិធីវិនិយោគឃុំកំពង់ត្របែកឆ្នាំ២០១៩ នឹងចុះពិនិត្យបច្ចេកទេសដល់ទីតាំងគម្រោងផ្ទាល់ សិក្សាវាស់វែង គូសប្លង់លម្អិត ដោយវិស្វករជំនាញសេវាករទី៦ និងបានប្រជុំពិគ្រោះយោបល់ជាសាធារណៈស្តីពីសុវត្ថិភាពសង្គម ដីធ្លី និងបរិស្ថាន កាលពីថ្ងៃទី ៧ ខែវិច្ឆិកា ឆ្នាំ២០១៩ ចុះអង្កេតវាស់វែងដីធ្លី និងប្រមូលទិន្នន័យដោយអ្នកជំនាញសេវាករទី៦ និងប្រជុំបូកសរុបលទ្ធផលសិក្សា ផលប៉ះពាល់ដីធ្លី និងទ្រព្យសម្បត្តិនៃកម្មសិទ្ធិករ ឬភោគី ឬអ្នកប្រើប្រាស់ដីធ្លី ដែលមានការប៉ះពាល់ និងគម្រោងនៅថ្ងៃទី២៨ ខែវិច្ឆិកា ឆ្នាំ២០១៩ ដេញថ្លៃនៅថ្នាក់ជាតិ នឹងចុះកិច្ចសន្យាជាមួយក្រុមហ៊ុនឈ្មោះតាំងឆេងអ័ង កាលពីថ្ងៃទី១៧ ខែមករា ឆ្នាំ២០២០ ដោយប្រើរយៈពេល ៦ ខែក្នុងការស្ថាបនាផ្លូវនេះ៕
