កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានថ្លែងថា យេីងរួមគ្នាកសាងសមិទ្ធផលជាច្រើនទៅបាននេះ លុះត្រាតែប្រទេសជាតិយេីងមានសុខសន្តិភាព ហើយយេីងរួមសាមគ្គីគ្នាទេីបមានការអភិវឌ្ឍន៍រីកចម្រើនផងដែរ ការថ្លែងយ៉ាងដូច្នេះក្នុងឱកាសសម្ពោធឆ្លងប្រាសាទ ស្រះទឹក និងសមិទ្ធផលនានា នៅវត្តអំពិលទ្វារ ស្ថិតក្នុងឃុំសំពងជ័យ ស្រុកជើងព្រៃ ខេត្តកំពង់ចាម នាព្រឹកថ្ងៃទី១៥ ខែកុម្ភៈ ឆ្នាំ២០២០ ។
ឆ្លៀតក្នុងឱកាសនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណចំពោះការរួមសាមគ្គីគ្នា ដែលបានធ្វេីឲ្យសមិទ្ធផលថ្មីៗជាច្រើនលេចចេញជារូបរាង ហើយត្រូវសម្ពោធឆ្លងនាពេលនេះ គឺកើតចេញពីសទ្ធាជ្រះថ្លារបស់សប្បុរសជននានា និងការដឹកនាំរបស់ព្រះគ្រូចៅអធិការវត្ត និងគណៈកម្មការអាចារ្យវត្ត ចាប់ពីឆ្នាំ២០១៧ ដល់ឆ្នាំ២០១៩ មានដូចជា ស្រះទឹក ជាវដីពង្រីកបរិវេណស្រះទឹកមុខវត្ត ជួសជុលប្រាសាទបាក់បែកក្នុងវត្តបរិវេណខាងជើងព្រះវិហារ កសាងគន្ធកុដិ ប្រាសាទ កសាងខឿនពោធិព្រឹក្ស កសាងសត្តមហាឋាន កសាងបង្គោលសូឡា ចាក់ដីបំពេញវត្ត និងកសាងខឿនបុព្វការី ដែលសរុបជាទឹកប្រាក់អស់ ១៣.៥៧៥០$ ។
ឯកឧត្តមអភិបាលខេត្ត បានថ្លែងបន្តថា ដោយសារប្រទេសជាតិយើងមានសុខសន្តិភាព ទេីបយេីងមានឱកាសធ្វើបុណ្យទានរួមគ្នា ខុសពីជំនាន់ប៉ុលពតដែលគេយកទីវត្តអារាមធ្វើជាគុក ឬធ្វើជាក្រោលសត្វ ដូច្នេះសូមឲ្យលោកយាយលោកតា ក៏ដូចជាបងប្អូនប្រជាពលរដ្ឋ រួមគ្នាថែរក្សានូវសុខសន្តិភាពមួយនេះ ឲ្យបានគង់វង្សយូរអង្វែង ដេីម្បីបន្តការអភិវឌ្ឍន៍រីកចម្រើនបន្តទៅទៀត។
ជាមួយគ្នានោះ ឯកឧត្តមអភិបាលខេត្ត ក៏បានអំពាវនាវសូមឲ្យលោកយាយលោកតា ត្រូវថែទាំសុខភាព បេីមានករណីមិនស្រួលក្នុងខ្លួន ត្រូវឲ្យកូនចៅប្រញាប់បញ្ជូនទៅមន្ទីរពេទ្យដែលនៅជិតៗ ដើម្បីទទួលការព្យាបាលទាន់ពេលវេលា និងអប់រំណែនាំដល់កូនចៅ ត្រូវគោរពច្បាប់ចរាចរ ចៀសឲ្យឆ្ងាយពីគ្រឿងញៀន ហើយកុំប្រព្រឹត្តល្បែងស៊ីសងគ្រប់ប្រភេទផងដែរ ៕