ក្រសួងអប់រំ យុវជននិងកីឡា គ្រោងនឹងដាក់បញ្ចូលមេរៀនអំពីបរិស្ថានក្នុងកម្មវិធីសិក្សាចាប់ពីកម្រិតមត្តេយ្យដល់កម្រិតឧត្តមនាពេលខាងមុខ ដើម្បីធានានិរន្តរភាព និងកិច្ចគាំពារបរិស្ថាន ក្នុងពិធីចុះហត្ថលេខាបង្កើតក្រុមការងាររួមរវាងក្រសួងអប់រំ និងក្រសួងបរិស្ថាន។
នៅថ្ងៃទី១៩ខែមករា ឆ្នាំ២០១៦ ឯកឧត្តម សាយ សំអាល់ រដ្ឋមន្ត្រីក្រសួងបិស្ថាន មានប្រសាសន៍ថា ការដាក់បញ្ចូលបញ្ហាបរិស្ថាននៅក្នុងកម្មវិធីសិក្សា នឹងជំរុញឲ្យមានការផ្លាស់ប្តូរផ្នត់គំនិតនិងការចូលរួមគាំពារបរិស្ថានសម្រាប់បច្ចុប្បន្ន និងអនាគត។ ឯកឧត្តមក៏បន្ថែមថា គម្រោងនេះ នឹងឆ្លើយតបលើបញ្ហាបរិស្ថាន ដែលកំពុងកើតឡើងនាពេលបច្ចុប្បន្ននេះ រួមមាន សំណល់រឹងរាវ វិទ្យុសកម្មក្នុងបរិយាកាស ការបំពុលខ្យល់ ដែលគំរាមកំហែងចំពោះសុខភាពមនុស្ស សត្វ និងធម្មជាតិជាដើម។
ឯកឧត្តម ហង់ ជួន ណារ៉ុន រដ្ឋមន្ត្រីក្រសួងអប់រំ បានបញ្ជាក់ថា ការដាក់បញ្ចូលគម្រោងនេះ គឺ ក្រសួងអប់រំបានសាកល្បងដាក់បញ្ចូលកម្មវិធីសិក្សាស្តីពីការប្រែប្រួលអាកាសធាតុ និងវិធីបន្សាំការប្រែប្រួលអាកាសធាតុរួចមក។ ប៉ុន្តែវាជាការសាកល្បងទ្រង់ទ្រាយតូចនៅឡើយ ៕