ខេត្ដតាកែវ៖ ព្រឹកថ្ងៃសៅរ៍ ១រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី៦ខែមិថុនា ឆ្នាំ២០២០ ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកកោះអណ្តែត និងមូលដ្ឋានឃុំធ្លាប្រជុំ ខេត្តតាកែវ អមដំណើរដោយឯកឧត្តម លោកជំទាវ លោក លោកស្រី ជារដ្ឋលេខាធិការ អនុរដ្ឋលេខាធិការ ទីប្រឹក្សា អគ្គនាយក អគ្គនាយករង ប្រធាននាយកដ្ឋាននិងសហការី អភិបាលរងខេត្ត ព្រមទាំងប្រធានក្រុមប្រឹក្សា អភិបាលស្រុក អាជ្ញាធរនៅមូលដ្ឋាន បានអញ្ជើញចុះទៅជួបសំណេះសំណាល និងសួរសុខទុក្ខជាមួយប្រជាពលរដ្ឋចំនួន ២៥៥គ្រួសារ មកពីភូមិរូង ឃុំធ្លាប្រជុំ ស្រុកកោះអណ្តែត ខេត្តតាកែវ។
ក្នុងឱកាសនោះដែរ ឯកឧត្តមរដ្ឋមន្ត្រី បានគូសបញ្ជាក់សារជាថ្មីម្តងទៀតពីសារ:សំខាន់ចាំបាច់នូវអនុសាសន៍ដឹកនាំរបស់រាជរដ្ឋាភិបាល និងការអនុវត្តដោយខ្ជាប់ខ្ជួននូវការណែនាំវេជ្ជសាស្ត្ររបស់ក្រសួងសុខាភិបាលក្នុងការបន្តចូលរួមប្រយុទ្ធប្រឆាំងជំងឺកូវីដ១៩ ក៏ដូចជាការរួបរួមកម្លាំងសាមគ្គីជួយយកអាសារគ្នារវាងប្រជាជនម្នាក់ៗ គ្រួសារនីមួយៗនិងសហគមន៍ភូមិនីមួយៗជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ ដើម្បីចូលរួមដោះស្រាយឱ្យបានជាក់ស្តែងនិងមានប្រសិទ្ធភាពនូវផលប៉ះពាល់ទាំងឡាយទាំងខាងសេដ្ឋកិច្ច សង្គមកិច្ច អប់រំ។ល។ ដែលបណ្តាលមកពីវិបត្តិនៃជំងឺកូវីដ១៩។
ឯកឧត្ដមរដ្ឋមន្រ្តី បានផ្តាំផ្ញេីរឱ្យអាជ្ញាធរនិងសមត្ថកិច្ចគ្រប់លំដាប់ថ្នាក់ត្រូវជួយប្រជាពលរដ្ឋជម្នះពុះពារបញ្ហាប្រឈមជាចម្បងក្នុងជីវភាពរស់នៅប្រចាំថ្ងៃ និងអនាម័យ ដេីម្បីកុំឱ្យឆ្លងជំងឺកូវីដ-១៩។
ក្នុងឱកាសនោះដែរ តំណាងគ្រួសារនីមួយៗបានទទួលអំណោយជាអង្ករ ១០kg មី ត្រីខ និងសម្ភារៈមួយចំនួន និងថវិកាមួយម៉ឺនរៀល របស់លោកជំទាវ និន សាផុន អ្នកតំណាងរាស្រ្តមណ្ឌលខេត្តតាកែវ។
