សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងលោកជំទាវ ថាយ វ៉ា គង់ សំអុល ប្រធានមន្ទីរពេទ្យសម្ភព បញ្ញា បានផ្ដួចផ្ដើមកសាងឡើងនូវ អង្គកឋិនទានដ៏ធំមួយ ប្រកបដោយសទ្ធា ដ៏ប្រសើជ្រះថ្លាក្រៃលែង ចំពោះព្រះពុទ្ធសាសនា ដើម្បីវេរប្រគេនព្រះសង្ឃ គង់នៅវត្តជម្ពូវ័ន ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
អញ្ជើញចូលរួមក្នុងពិធីចម្រើនព្រះបរិត្តអង្គកឋិនទានដ៏សំខាន់នេះ នៅវេលារសៀល ថ្ងៃ១រោច ខែអស្សុជ ត្រូវនឹងថ្ងៃទី០៣ ខែតុលា ឆ្នាំ២០២០ មានសម្ដេចចៅហ្វាវាំង គង់ សំអុល ឧបនាយករដ្ឋមន្រ្តី រដ្ឋមន្រ្តីក្រសួង ព្រះបរមរាជវាំង, លោកជំទាវ ថាយ វ៉ា គង់សំអុល ប្រធានមន្ទីពេទ្យ សម្ភពបញ្ញា និងក្រុមគ្រួសារ, ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រី ទទួលបន្ទុកកិច្ចការទូទៅ អមក្រសួងព្រះបរមរាជវាំង និងលោកស្រី សុក នារី គុយ សុផល, ឯកឧត្តម ឈា ហន, ឯកឧត្តម អន ស៊ាម រដ្ឋមន្រ្តីអមក្រសួងព្រះបរមរាជវាំង, ឯកឧត្តម ឈិន កេតនា អនុប្រធានអចិន្រ្តៃយ៍ និងជាអគ្គលេការធិការ នៃគណៈកម្មាធិការជាតិ រៀបចំបុណ្យជាតិអន្តរជាតិ ព្រមទាំងមន្រ្តីក្រសួងព្រះបរមរាជវាំង មន្រ្តីគណៈកម្មាធិការជាតិរៀបចំបុណ្យជាតិ អន្តរជាតិ និងមន្រ្តីរាជការ នៃមន្ទីររបស់ខេត្តកំពង់ឆ្នាំង និងពុទ្ធបរិស័ទ្ធចំណុះជើងវត្តជម្ពូវ័ន។
ពិធីនេះបានប្រព្រឹត្តទៅ ដោយមានការនិមន្តព្រះសង្ឃ ចំរើនព្រះបរិត្ត សម្ដែងព្រះធម្មទេសនា អំពីអានិសង្ឃដែលកើតឡើង អំពីសទ្ធាជ្រះថ្លាក្នុងការកសាងឡើង នូវអង្គកឋិនទាន និងបានបំពេញកិច្ចដ៏ប្រពៃផ្សេងៗទៀត ទៅតាមប្រពៃណីរបស់ព្រះពុទ្ធសាសនា។
គួររំលឹកថា សម្ដេចចៅហ្វាវាំង ឯកឧត្តមឧបនាយករដ្ឋមន្ត្រី រដ្ឋមន្រ្តីក្រសួងព្រះបរមរាជវាំង និងលោកជំទាវ តែងតែបានផ្ដួចផ្ដើមឡើង នូវការកសាងអង្គព្រះកឋិនទាន ជារៀងរាល់ឆ្នាំ វេរប្រគេនព្រះសង្ឃគង់នៅវត្តជម្ពូវ័ន និងនៅតាមទីអារាមនានា។
មិនតែប៉ុណ្ណោះ សម្ដេចចៅហ្វាវាំង និងលោកជំទាវ គឺជាពុទ្ធបរិស័ទ្ធដ៏ប្រសើរបស់កម្ពុជា ដែលបានលះបង់នូវធនធានផ្ទាល់យ៉ាងច្រើន ក្នុងសទ្ធាជ្រះថ្លាគោរពចំពោះ ព្រះពុទ្ធសាសនា ក្នុងនោះសម្ដេចចៅហ្វាវាំង និងលោកស្រី ព្រមទាំងក្រុមគ្រួសារ និងថ្នាក់ដឹកនាំ មន្ត្រីរាជការក្រសួងព្រះបរមរាជវាំង បានកសាងសមិទ្ធិផលសំខាន់ៗ ជាច្រើន ប្រគេនព្រះសង្ឃគង់នៅវត្តជម្ពូវ័ន និងបណ្ដាទីអារាមដទៃទៀត ដើម្បីរួមចំណែក ជួយលើកតម្កើងវិស័យព្រះពុទ្ធសាសនា នៅកម្ពុជា ឲ្យមានការរីកចម្រើនជាដរាបតរៀងទៅ។
ចំពោះការកសាងអង្គកឋិនទាន ដែលផ្ដួចផ្ដើមឡើងដោយ សម្ដេចចៅហ្វាវាំង និងលោកជំទាវ នៅពេលនេះ មានបច្ច័យយ៉ាងច្រើន ក្នុងនោះមានបច្ច័យ សម្ដេចចៅហ្វាវាំង គង់ សំអុល និងលោកជំទាវ ថាយ វ៉ាគង់ សំអុល ព្រមទាំងក្រុមគ្រួសារ, បច្ច័យឯកឧត្តម គុយ សុផល និងលោកជំទាវ សុខ នារីគុយ សុផល, ព្រមទាំងបច្ច័យដែលកើតឡើង ពីសេចក្ដីជ្រះថ្លារបស់ថ្នាក់ដឹកនាំ មន្រ្តីរាជការ កងកម្លាំងនគរបាលក្រសួងព្រះបរមរាជវាំង ថ្នាក់ដឹកនាំមន្រ្តីរាជការ នៃគណៈកម្មាធិការជាតិ រៀបចំបុណ្យជាតិ អន្តរជាតិ និងមន្រ្តីរាជការនៃមន្ទីររបស់ខេត្តកំពង់ឆ្នាំង បុគ្គលិកមន្ទីពេទ្យសម្ភពបញ្ញា ពុទ្ធបរិស័ទ្ធចំណុះជើងវត្តជម្ពូវ័ន ព្រមទាំងការកសាងត្រៃធំ និងបរិក្ខាផ្សេងៗ សម្រាប់ជួយទ្រទង់ជីវភាពព្រះសង្ឃ និងការកសាងសមិទ្ធផលនានា នៅក្នុងវត្តជម្ពូវ័ននេះ។
គួររំលឹកថាបុណ្យ កសាងអង្គកឋិនទាន ជាបុណ្យដ៏ធំមួយមានប្រវត្តិ កំណើតតាំងពីក្នុងសម័យកាលដែលព្រះសម្មាសម្ពុទ្ធ ព្រះបរមគ្រូនៃយើងទ្រង់គង់ នៅ ហើយក្នុងសម័យបុព្វកាលនោះ មានសេដ្ឋីអាណាបណ្ឌិតជាអ្នកផ្តួចផ្តើម កសាងអង្គកឋិនទានមុនគេថ្វាយព្រះសម្មាសម្ពុទ្ធ។
លុះដល់វេលាព្រឹក ០២រោជ ខែអស្សុជ ត្រូវនឹងថ្ងៃទី៤ ខែតុលា ឆ្នាំ២០២០ សម្តេចចៅហ្វាងវាំង គង់ សំអុល ឧបនាយករដ្ឋមន្ត្រី រដ្ឋមន្ត្រី្កក្រសួងព្រះបរមរាជ វាំង និងលោកជំទាវ ថាយ វ៉ា គង់ សំអុល ប្រធានមន្ទីរពេទ្យសម្ភព បញ្ញា ព្រមទាំងក្រុមគ្រួសារ ឯកឧត្តម គុយ សុផល ឧត្តមប្រឹក្សាផ្ទាល់មហាក្សត្រ និងជាទេសរដ្ឋមន្ត្រី ទទួលបន្ទុកកិច្ចការ ទូទៅអមក្រសួងព្រះបរមរាជវាំង និងលោកជំទាវ សុខ នារី គុយ សុផល ព្រមទាំងថ្នាក់ដឹកនាំមន្ត្រីរាជការក្រសួង ព្រះមររាជវាំង ថ្នាក់ដឹកនាំមន្ត្រីរាជការក្នុងស្ថាប័ននានា និងសប្បុរសជនជាច្រើនរូប បានអញ្ជើញចូលរួមក្នុងពិធីដង្ហែរអង្គព្រះកឋិនទានដ៏ធំនេះ ដែលផ្តួចផ្តើម ឡើងដោយសម្តេចចៅហ្វាវាំង និងលោកជំទាវ ប្រគេនព្រះសង្ឃគង់នៅវត្ត ជម្ពូវន្ត។
ពិធីបុណ្យបានប្រារព្ធនូវការដង្ហែរប្រទក្សិណ ជាកិច្ចគោរពចំពោះ ព្រះរតនត្រ័យ បន្ទាប់មកសម្តេចចៅហ្វាវាំង និងលោកស្រី ព្រមទាំងថ្នាក់ដឹកនាំ មន្ត្រីរាជការ សប្បុរសជន និងពុទ្ធបរិស័ទ បានប្រារព្ធនូវបទ នមស្សកា ព្រះរតនត្រ័យ សមាទានសីល។ លំដាប់អំពីនេះ បាននិមន្តព្រះសង្ឃ បំពេញកិច្ចក្នុងពីធីវេរប្រគេនអង្គកឋិនទាន ស្វាធ្យាយពុទ្ធជ័យមង្គលប្រគេនត្រ័យ លៀងទេយ្យទាន និងបវរណាចតុបច្ច័យ ប្រគេនព្រះសង្ឃគ្រប់ព្រះអង្គ។
ជាមួយគ្នានេះ បានប្រគេន គ្រឿងបរិក្ខា នៃអង្គព្រះកឋិនទាន និងបច្ច័យសង្កត់លើត្រ័យ ដែលជាសទ្ធាដ៏ខ្ពង់ខ្ពស់ របស់សម្តេចចៅហ្វាវាំង និងលោកស្រី ព្រមទាំងក្រុមគ្រួសារ លោក គុយ សុផល និងលោកស្រី ព្រមទាំងថ្នាក់ដឹកនាំមន្ត្រីរាជការក្រសួង ព្រះបរមរាជវាំង ថ្នាក់ដឹកនាំមន្ត្រីរាជការក្នុងស្ថាប័ននានា សប្បុរសជន និងពុទ្ធបរិស័ទចំណុះ ជើងវត្ត វេរប្រគេនព្រះសង្ឃសម្រាប់ជាគុណប្រយោជន៍ ក្នុងការជួយទ្រទ្រង់ជីវភាពព្រះសង្ឃ និងការកសាងសមិទ្ធផលនានាក្នុងវត្តជម្ពូវន្តនេះ៕
