អភិបាលខេត្តបន្ទាយមានជ័យឯកឧត្តម អ៊ុំ រាត្រី បានថ្លែងថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជានិច្ចកាល តែងបានផ្តោតការយកចិត្តទុកដាក់យ៉ាងខ្លាំង ចំពោះបងប្អូនក្រុមគ្រួសារអតីតយុទ្ធជនពលី ពិការដើម្បីកែប្រែជីវភាពរស់នៅរបស់ពួកគាត់ ឱ្យកាន់តែមានភាពប្រសើរឡើងថែមទៀតនោះ ។
ការថ្លែងបែបនេះរបស់ឯកឧត្តម អ៊ុំ រាត្រី ដែលជាប្រធានកិត្តិយសសមាគមអតីតយុទ្ធជនកម្ពុជាខេត្តបន្ទាយមានជ័យ បានធ្វើឡើងក្នុងឱកាសអញ្ជើញបើកផ្តល់ប្រាក់ធានារ៉ាប់រង សង្គម ប្រាក់បូជាសព ប្រាក់ឧបត្ថម្ភ ០១លើកដំបូង ជូនគ្រួសារសពអតីតយុទ្ធជន ចំនួន២២ គ្រួសារដែលមានជនពិការចំនួន១៣នាក់ និងនិវត្តជនចំនួន៩នាក់ ស្មើនឹងទឹកប្រាក់ចំនួន ១៧១. ២៧៨.៦៧០រៀល កាលពីរសៀលថ្ងៃ១៤កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃចន្ទ ទី២៨ ខែធ្នូ ឆ្នាំ២០២០ ។
ឯកឧត្តម អ៊ុំ រាត្រី បានថ្លែងកោតសរសើរដល់អតីតយុទ្ធជនទាំងអស់ ដែលកន្លងមក បានតស៊ូដោយបូជាសាច់ស្រស់ឈាមស្រស់ ក្នុងការច្បាំងតតាំង និងខ្មាំងសត្រូវឈ្លានពាន ទឹកដី រហូតដល់ធ្វើឱ្យប្រទេសកម្ពុជាទាំងមូលមានស្ថិរភាពពេញលេញ និងមានសុខសន្តិភាព សន្តិសុខល្អ និងមានការអភិវឌ្ឍន៍លើគ្រប់វិស័យ ដែលមិនអាចកាត់ថ្លៃបាននោះ។ ដោយសារ បងប្អូនអតីតយុទ្ធជនទាំងអស់នេះ មានគុណជាមួយជាតិខ្លាំងនោះ ទើបរាជរដ្ឋាភិបាលបាន យកចិត្តទុកដាក់លើបងប្អូនអតីតយុទ្ធជនទាំងនេះ យ៉ាងខ្លាំងធ្វើឱ្យក្រុមគ្រួសារអតីតយុទ្ធជន ទាំងអស់នេះមានភាពកក់ក្តៅ និងមានជំនឿជឿជាក់លើរាជរដ្ឋាភិបាលក្រោមការដឹកនាំរបស់ សម្តេចតេជោ ហ៊ុន សែន ។
ឯកឧត្តមបានឱ្យដឹងថា សមាគមអតីតយុទ្ធជនកម្ពុជា ត្រូវបានបង្កើតឡើងក្រោមការ ដឹកនាំរបស់សម្តេចតេជោ ហ៊ុន សែន ដែលមានគោលបំណងរួមគ្នាជួយទ្រទ្រង់ដល់អតីតយុទ្ធ ជន ក៏ដូចក្រុមគ្រួសារឱ្យមានភាពកក់ក្តៅក្នុងការរស់នៅក្នុងសង្គម។
នៅក្នុងឱកាសនោះ ឯកឧត្តម អ៊ុំ រាត្រី ក៏បានក្រើនរម្លឹកដល់បងប្អូនក្រុមគ្រួសារអតីត យុទ្ធជនទាំងអស់ ឱ្យយកចិត្តទុកដាក់ការរស់នៅត្រូវប្រកាន់ខ្ជាប់អនាម័យស្អាតជានិច្ច ដើម្បី ចៀសវាងជំងឺរាត្បាតផ្សេងៗពិសេសនោះជំងឺកូវីដ-១៩ ត្រូវអនុវត្តន៍តាមវិធានរបស់ក្រសួង សុខាភិបាល។ ត្រួវបន្តយកចិត្តទុកដាក់លើការងារបង្កបង្កើនផលដាំដុះដំណាំបន្លែ ចិញ្ចឹមសត្វ ត្រីឱ្យបានច្រើន ដើម្បីរកចំណូលសម្រាប់ជួយទ្រទ្រង់ជីវភាពគ្រួសារឱ្យបានប្រសើរថែមទៀត៕
