ដើម្បីឆ្លើយតបតាមតម្រូវការជីវភាពរបស់ប្រជាពលរដ្ឋដែលជាជនងាយរងគ្រោះ ជាជនចាស់ជរា ជនពិការមានការខ្វះខាត នៅរលៀលថ្ងៃ១៤កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃចន្ទ ទី២៨ ខែធ្នូ ឆ្នាំ២០២០ ឯកឧត្តម ថង សាវុន អភិបាលខេត្ត និង ជាប្រធានគណៈកម្មាធិការសាខាកាកបាទក្រហមកម្ពុជាខេត្តរតនគិរី រួមទាំងឯកឧត្តម លោកជំទាវអនុប្រធាន សមាជិក សមាជិកា អនុសាខាស្រុក និងសហការី បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ផ្តល់ជូនជនងាយរងគ្រោះ ចាស់ជរា ជនពិការ និងគ្រួសារក្រីក្រចំនួន ២២៣គ្រួសារមកពីឃុំទាំង៣របស់ស្រុកអណ្តូងមាស ខេត្តរតនគិរី។
មានប្រសាសន៍សំណេះសំណាលជាមួយបងប្អូនប្រពលរដ្ឋដែលមកទទួលអំណោយនៅទីតាំង៣កន្លែងខាងលើ ឯកឧត្តម ថង សាវុន បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ឯកឧត្តមបានបន្តថា អំណោយមនុស្សធម៌ដែលបាននាំយកមកចែកជូនពុកម៉ែ បងប្អូននាពេលនេះ ដើម្បីជួយសម្រាលទុក្ខលំបាករបស់ពុកម៉ែបងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេស គឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោលឡើយ ពោលគឺ” ទីណាមានទុក្ខលំបាក ទីនោះមានកាកបាទក្រហមកម្ពុជាចុះជួយជានិច្ច”។
សូមបញ្ជាក់ថា អំណោយរបស់សាខាកាកបាទក្រហមកម្ពុជាខេត្តរតនគិរី ផ្តល់ជូនជនងាយរងគ្រោះជាជនចាស់ជរា ជនពិការ និងគ្រួសារក្រីក្រទាំង ២២៣គ្រួសារ នាពេលនេះក្នុងមួយគ្រួសារៗទទួលបានអង្ករ ២៥គីឡូ ត្រីខ ១យួរ និងមី១កេសផងដែរ។ ក្នុងឱកាសនេះឯកឧត្តមបានប្រគល់ជែលសម្រាប់លាងដៃ និងម៉ាសជូនយុវជនស.ស.យ.កស្រុក និង អាជ្ញាធរស្រុកទុកប្រើប្រាស់ជាប្រយោជន៍សាធារណៈផងដែរ៕ ដោយ ណយ នឿន (ប្រភព:មន្ទីរព័ត៌មានខេត្តរតនគិរី) សម្រួលផ្សាយដោយ៖ ធូ កុសល
