ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន និងលោកជំទាវ ទេព រង្សុី លោកយាយឧបាសិកា ពេន យុត ព្រះសង្ឃគ្រប់ព្រះអង្គ សិស្សនិស្សិត និងអាចារ្យ គណៈកមមការ ព្រមទាំងសីលវតីទាំងអស់នៃវត្តមង្គលវ័ន ហៅស្វាយដង្គុំ សូមចូលរួមត្រេកអរ និងរីករាយជ្រះថ្លាចំពោះឧបាសិកា ពេន យុត កុសលចិត្តាមហាឧបាសិកាពុទ្ធសាសនូបត្ថម្ភក៍ និងជាប្រធានសីលវតី វត្តមង្គលវ័ន ហៅស្វាយដង្គុំ ព្រមទាំងក្រុមគ្រួសារ រួមជាមួយ ថ្នាក់ដឹកនាំ មន្រ្តីរាជការ ក្រសួងព័ត៌មាន ក៏ដូចជាប្រជាពលរដ្ឋជាពុទ្ធបរិស័ទ ជិតឆ្ងាយ បានអញ្ជើញចូលក្នុងពិធីសូត្រមន្ត រាប់បាត្រ ថ្ងៃបុណ្យឆ្លង មាឃបូជា នៅទីអារាមវត្តមង្គលវ័ន ហៅស្វាយដង្គុំ រាជធានីភ្នំពេញ ថ្ងៃសុក្រ ៣រោច ខែមាឃ ឆ្នាំជូត ទោស័ក ព. ស. ២៥៦៤ ត្រូវនឹងថ្ងៃទី២៩ ខែមករា ឆ្នាំ២០២១។
បុណ្យមាឃបូជា គឺជាព្រឹត្តិការណ៍សំខាន់មួយនៅក្នុងព្រះពុទ្ធសាសនាដើម្បីរំឭកដល់ព្រះសម្មាសម្ពុទ្ធបរមគ្រូនៃយើង កាលព្រះអង្គទ្រង់នៅមានព្រះជន្មាយុ និងដើម្បីប្រារឰរំឭកដល់ព្រឹត្តិការណ៍ធំៗដូចជា៖
– រំឭកដល់ថ្ងៃប្រជុំចតុរង្គសន្និបាត (ប្រកបដោយអង្គ៤) នៃព្រះភិក្ខុសង្ឃទាំង១២៥០អង្គ នាថ្ងៃ១៥កើត ខែមាឃ។
– រំឭកដល់ថ្ងៃដែលព្រះសម្មាសម្ពុទ្ធជាម្ចាស់ទ្រង់បានដាក់អាយុសង្ខារ។
– រំឭកដល់ថ្ងៃដែលព្រះសម្មាសម្ពុទ្ធទ្រង់សម្ដែងនូវឱវាទបាតិមោក្ខ។
– រំឭកដល់ថ្ងៃដែលព្រះសម្មាសម្ពុទ្ធទ្រង់តែងតាំងព្រះអគ្គសាវ័កឆ្វេងស្ដាំ។
