នៅក្នុងឱកាសខួបលើកទី៣០ឆ្នាំ នៃទំនាក់ទំនងរវាងរុស្ស៊ី និងអាស៊ាន គណបក្សរួបរួមរុស្ស៊ី គ្រោងនឹងរៀបចំកិច្ចពិភាក្សាតុមូល ជាមួយនឹងថ្នាក់ដឹកនាំគណបក្សនយោបាយ នៃបណ្តាប្រទេសអាស៊ាន ក្រោមប្រធានបទស្តីពី «តួនាទីនៃកម្លាំងគណបក្សនយោបាយរុស្ស៊ីនិងអាស៊ានប្រកបដោយការទទួលខុសត្រូវ ក្នុងការពង្រឹងស្ថាបត្យកម្មសន្តិសុខ និងកិច្ចសហប្រតិបត្តិការនៅក្នុងតំបន់អាស៊ី-ប៉ាស៊ីហ្វិក» នៅថ្ងៃទី២៩ ខែមិថុនា ឆ្នាំ២០២១ តាមប្រព័ន្ធអ៊ីនធើណែត។
ដើម្បីត្រៀមរៀបចំកិច្ចពិភាក្សាតុមូលនៃថ្នាកដឹកនាំគណបក្សនយោបាយ ភាគីរុស្ស៊ីបានរៀបចំកិច្ចប្រជុំអ្នកជំនាញ នាថ្ងៃទី១១ ខែមិថុនា ឆ្នាំ២០២១ ដែលមានការចូលរួមពី ឯកឧត្តម សួស យ៉ារ៉ា និង ឯកឧត្តម ចែម វីឌ្យា អនុប្រធានគណៈទាក់ទងបរទេស នៃគណបក្សប្រជាជនកម្ពុជា។
កិច្ចប្រជុំអ្នកជំនាញនេះក៏មានការចូលរួមពីតំណាងគណបក្សនយោបាយនៃតំបន់អាស៊ានផ្សេងទៀត មកពីគណបក្សបដិវត្តប្រជាជនឡាវ គណបក្ស Golkar (ឥណ្ឌូនេស៊ី) គណបក្សប្រជាធិបតេយ្យហ្វីលីពីន-កម្លាំងប្រជាជន (PDP-Laban) គណបក្សកុម្មុយនីស្តវៀតណាម ដែលបានពិភាក្សាអំពីការត្រៀមរៀបចំកិច្ចពិភាក្សាតុមូល ព្រមទាំងផ្លាស់ប្តូរនូវទស្សនៈនានាអំពីបញ្ហានិងឱកាស ពាក់ព័ន្ធនឹងការពង្រឹងស្ថាបត្យកម្មសន្តិសុខក្នុងតំបន់ និងកិច្ចសហប្រតិបត្តិការគណបក្សនយោបាយនៅក្នុងតំបន់អាស៊ីប៉ាស៊ីហ្វិក៕
