កាកបាទក្រហមកម្ពុជា បាននាំយកអំណោយជូនជនពិការចំនួន ៥២នាក់ នៅខេត្តកណ្តាល ។ នៅថ្ងៃទី១៦ ខែកុម្ភៈ នេះគណៈប្រតិភូកាកបាទក្រហមកម្ពុជា បានជួបសំណេះសំណាលសួរសុខទុក្ខ និងប្រគល់អំណោយមនុស្សធម៌កាកបាទក្រហមកម្ពុជា ជូនដល់សមាគមតន្រ្តី សំនៀងជនពិការ ដែលមានសមាជិក-សមាជិកា និងបុគ្គលិក នៃជនពិការចំនួន ៥២នាក់ មានទីតាំងបណ្តោះអាសន្ននៅភូមិស្វាយរលំ ស្រុកស្អាង ខេត្តកណ្តាល។
ក្រុមជនពិការទាំង ៥២នាក់នេះ គឺជាក្រុមដែលចងក្រងគ្នាជាសមាគមតន្ត្រីសំនៀងជនពិការ តាំងពីឆ្នាំ២០១២ ដើម្បីស្វែងរកប្រាក់ចិញ្ចឹមជីវិត តាមរយៈការបង្ហើរសំនៀងគ្រប់ទីកន្លែង។ សមាគមតន្ត្រីសំនៀងជនពិការនេះ ធ្លាប់ទទួលបានអំណោយឧបត្ថម្ភជាស្បៀង សម្ភារៈ និងថវិកាពីកាកបាទក្រហមកម្ពុជាចំនួន ៣លើករួចមកហើយ ដែលថ្ងៃនេះគឺជាលើកទី៤ ហើយ ។
អំណោយដែលបានប្រគល់ជូនរួមមានអង្ករ ២តោន, មី ២៥កេស, ត្រីខ៣ កេស, ទឹកស៊ីអ៊ីវ១២ ដប, ទឹកត្រី ១២ដប, ប្រេងឆា ២កេស, ទឹកបរិសុទ្ធ ១០កេស, ទឹកក្រូច ៦កេស, សាប៊ូកក់សក់ ៥កេស, ម្សៅសាប៊ូ ៣កេស និងថវិកា ៥លានរៀល ។
ជនពិការដែលចូលរួមក្នុងកម្មវិធីនោះម្នាក់ៗ ទទួលបានថវិកាមនុស្សធម៌ ៥ម៉ឺនរៀល ព្រមទាំងសម្ភារៈប្រើប្រាស់ផ្ទាល់ខ្លួនផងដែរ ៕