ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានទទួល ជួបសំណេះសំណាលជាមួយក្មួយៗនិស្សិត ដែលទទួលបានអាហារូបករណ៍ទៅបន្តការ សិក្សាប្រទេសជប៉ុន កាលពីព្រឹកថ្ងៃទី២១ ខែកញ្ញា ឆ្នាំ២០២១ នៅទីស្តីការក្រសួង។
ក្នុងឱកាសនោះ ឯកឧត្តមរដ្ឋមន្ត្រី ចូលរួមអបអរសាទរចំពោះនិស្សិតដែលទទួល បានជ័យលាភីអាហារូបករណ៍ និងបានវាយតម្លៃខ្ពស់ចំពោះសមត្ថភាពរបស់ក្មួយៗ ដែល បានឆ្លងកាត់ការធ្វើតេស្តយ៉ាងលំបាកដោយស្ថានទូតជប៉ុនប្រចាំព្រះរាជាណាចក្រកម្ពុជា។
ឯកឧត្តមបន្តថា លទ្ធផលនេះបានបង្ហាញឱ្យឃើញអំពីការយកចិត្តទុកដាក់ ខិតខំតស៊ូរៀនសូត្រដែលមានគុណតម្លៃសម្រាប់ធ្វើការកសាង និងអភិវឌ្ឍន៍ប្រទេស កំណើតរបស់ខ្លួននៅពេលអនាគត។ ឆ្លៀតយកឱកាសនេះ ឯកឧត្តមរដ្ឋមន្រ្តី បានចែក រំលែកបទពិសោធន៍ផ្ទាល់ខ្លួនរបស់លោកទាក់ទងនឹងការសិក្សារៀនសូត្រ បទពិសោធន៍ ការងារ ការធ្វើជាមន្រ្តីល្អ បុគ្គលល្អ ពលរដ្ឋល្អ រហូតបានក្លាយជាថ្នាក់ដឹកនាំម្នាក់ស្ម័គ្រ ស្មោះបម្រើជាតិមាតុភូមិ និងប្រជាជនដើម្បីការកសាង និងអភិវឌ្ឍន៍ប្រទេសឱ្យ មានការរីកចម្រើន។
ឯកឧត្តមរដ្ឋមន្ត្រី បានជូនពរក្មួយៗឱ្យទទួលបានសេចក្តីសុខ សុវត្ថិភាព និង ជោគជ័យក្នុងការសិក្សា ដើម្បីនាំយកចំណេះដឹង បទពិសោធន៍ល្អៗទាំងអស់នោះ មកចែករំលែក និងចូលរួមអភិវឌ្ឍន៍ប្រទេសក្រោមម្លប់សុខសន្តិភាព ក្រោមការដឹកនាំ ប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តី។
គួរបញ្ជាក់ផងដែរថា សម្រាប់ឆ្នាំ២០២១-២០២២ មាននិស្សិតចំនួន ២៦នាក់ (ស្រ្តី ១០) ត្រូវបានរាជរដ្ឋាភិបាលជប៉ុនតាមរយៈស្ថានទូត ធ្វើការជ្រើសរើសផ្តល់ អាហារូប ករណ៍ឱ្យទៅបន្តការសិក្សាថ្នាក់អនុបណ្ឌិតចំនួន ២៤នាក់ និងបណ្ឌិតចំនួន ២នាក់ ទៅតាមមុខជំនាញ និងសាកលវិទ្យាល័យនានានៅទូទាំងប្រទេសជប៉ុន ដោយពួកគេនឹង ត្រូវចេញដំណើរក្នុងពេលឆាប់ៗខាងមុខនេះ៕
