កិច្ចប្រជុំកំពូលអាស៊ាន-អាមេរិក បានប្រព្រឹត្តទៅក្រោមអធិបតីភាព ប្រធានាធិបតីសហរដ្ឋអាម៉េរិក និងមេដឹកនាំប្រទេសអាស៊ានទាំង១០ បានបញ្ចេញទស្សនៈយល់ឃើញពីអនាគតនៃទំនាក់ទំនងពាណិជ្ជកម្ម និងករណីការពារសន្តិសុខក្នុងតំបន់អាស៊ីប៉ាស៊ីហ្វិកផងដែរ ។
លោកប្រធានាធិបតីសហរដ្ឋអាម៉េរិក បារ៉ាក់ អូបាម៉ា ក្នុងប្រសាសន៍ថ្លែងបើកកិច្ចប្រជុំកំពូល បានប្រាប់មេដឹកនាំប្រទេសទាំង១០ នូវបំណងរបស់សហរដ្ឋអាម៉េរិក ដែលចង់រកតុល្យភាពសាឡើងវិញ នូវនយោបាយការបរទេសក្នុងតំបន់ ។ សហរដ្ឋអាម៉េរិកក៏ជាប្រទេសមួយ នៅក្នុងតំបន់អាស៊ីប៉ាស៊ីហ្វិកផងដែរ ។ លោកប្រធានាធិបតីបានថ្លែងទៀតថា ដើម្បីតុល្យភាពនយោបាយការបរទេសនេះ សហរដ្ឋអាម៉េរិក នឹងត្រូវរកកិច្ចសហប្រតិបត្តិការជាមួយនឹងប្រទេសអាស៊ាន និងបណ្តាប្រទេសនៅអាស៊ីអាគ្នេយ៍ដទៃទៀត ក្នុងការប្រើប្រាស់តួនាទីអាម៉េរិក ដើម្បីអោយធំធេងជាងនេះ និងយូរអង្វែងទៅអនាគត ។
លោក ប៉ារ៉ាក់ អូបាម៉ា បានបញ្ជាក់ទៀតថា ការប្រើប្រាស់តួនាទីរបស់សហរដ្ឋអាមេរិកក្នុងតំបន់អាស៊ីប៉ាស៊ីហ្វិក រួមមានបទដ្ឋានការអនុវត្តន៍ច្បាប់អន្តរជាតិ និងសេរីភាពនៃការធ្វើដំណើរលើផ្ទៃសមុទ្ធអន្តរជាតិ និងការដោះស្រាយជម្លោះតាមរយៈមធ្យោបាយច្បាប់ និងដោយសន្តិភាពថែមទៀត ។ ការចូលរួមជាមួយគ្នាដើម្បីប្រឈមដោះស្រាយបញ្ហាកើតឡើងក្នុងពិភពលោក ដោយលោកធ្វើការបញ្ជាក់ថា មិនអាចមានប្រជាជាតិតែម្នាក់ឯងណាមួយ ដោះស្រាយដោយខ្លួនឯងនោះទេ ។ លោកបានលើកពីកត្តាប្រឆាំងអំពើភេរវកម្ម និងហេតុការណ៍កើតឡើងថ្មីៗ ដោយអំពើភេរវកម្មក្នុងពិភពលោកដើម្បីការរួមគ្នាប្រឆាំងនឹងអំពើទាំងឡាយនោះ ។
នៅក្នុងកិច្ចប្រជុំកំពូលពិសេសនោះដែរ មេដឹកនាំទាំងអស់ បានអះអាងជាថ្មីនូវ គោលការណ៍សំខាន់ ដែលនឹងកំណត់កិច្ចសហប្រតិបត្តិការឆ្ពោះទៅមុខ ពិសេសការគោរពគ្នាទៅវិញទៅមក នូវឯកភាពអធិបតេយ្យភាព និងភាពស្មើគ្នានៃរដ្ឋទាំងអស់ ពិសេសលើសារៈសំខាន់នៃវិបុលភាពរួមកំណើនសេដ្ឋកិច្ចប្រកបដោយចិរភាព និងដោយរួមបញ្ចូលគ្នា និងការបណ្តុះបណ្តាលអ្នកដឹកនាំវ័យក្មេង ដើម្បីរក្សានូវសន្តិភាព ការអភិវឌ្ឍនិងស្ថិរភាពតំបន់ ។
សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ក្នុងកិច្ចប្រជុំទៅកាន់មេដឹកនាំអាស៊ាន សហរដ្ឋអាម៉េរិក ដោយផ្តល់នូវចំណុចគន្លឹៈមួយចំនួន ក្នុងនោះរួមមានការពង្រឹង… ការចែករំលែកព័ត៌មាន និងបណ្តាញទំនាក់ទំនង ដើម្បីជំរុញគំនិតច្នៃប្រឌិតថ្មីៗ និងភាពប៉ិនប្រសប់នៅក្នុងស្ថាប័នឧត្តមសិក្សា និងក្នុងវិស័យពាណិជ្ជកម្ម ។ សម្តេចបានមានប្រសាសន៍ អំពីការបង្កលក្ខណៈងាយស្រួលក្នុងការផ្ទេរបច្ចេកវិទ្យា… ការសំរបទៅនឹងការផ្លាស់ប្តូរ… និងការគាំទ្រតាមរយៈគោលនយោបាយផ្សេងៗ សម្រាប់ការស្រាវជ្រាវ និងការអភិវឌ្ឍសហគ្រាស ។ សម្តេចបានមានប្រសាសន៍ផ្តោតការយកចិត្តទុកដាក់ លើការអភិវឌ្ឍកិច្ចការស្រាវជ្រាវ និងការបង្កើតសួនបច្ចេកវិទ្យា មន្ទីរពិសោធន៍ស្រាវជ្រាវរួមគ្នារវាងរដ្ឋាភិបាល និងសាជីវកម្មអាស៊ាន និងសហរដ្ឋអាម៉េរិក… ការពង្រឹងការតភ្ជាប់រវាងបណ្តាញស្រាវជ្រាវ និងអភិវឌ្ឍន៍ រវាងអាស៊ាននិងសហរដ្ឋអាមេរិក តាមរយៈរដ្ឋាភិបាល ក្រុមហ៊ុន និងសកលវិទ្យាល័យក្នុងវិស័យសំខាន់ៗ ដូចជាៈ សុខាភិបាល និងវេជ្ជសាស្រ្តជាដើម និងការបង្កើតកម្មវិធីជំរុញការចូលរួមរបស់អាស៊ាន ក្នុងបណ្តាញផលិតកម្ម និងក្នុងខ្សែសង្វាក់តម្លៃតំបន់ និងសកលរួមបញ្ចូលទាំងការរួមគ្នា ទាក់ទាញក្រុមហ៊ុននាំមុខក្នុងវិស័យបច្ចេកវិទ្យា ឲ្យមកវិនិយោគនៅក្នុងតំបន់ ព្រមជាមួយនឹងការបង្កើតឧស្សាហកម្មជាចង្កោម និងឧស្សាហកម្មគាំទ្រក្នុងអាស៊ាន ។
លោកប្រធានាធិបតីអាម៉េរិក បានលើកពីកិច្ចព្រមព្រៀងពាណិជ្ជកម្ម TPP Trans-Pacific-Partnership មានន័យថា ភាពជាដៃគូប្រទេសឆ្លងកាត់ប៉ាស៊ីហ្វិក និងលោកបានលើកពីប្រទេសវៀតណាម ព្រុយណេ សឹង្ហបុរី និងម៉ាឡេស៊ី និងកិច្ចប្រឹងប្រែងរបស់ប្រទេសទាំង៤ នោះ ក្នុងការចូលរួមពាណិជ្ជកម្មTPP ដែលបង្កើតដោយសហរដ្ឋអាម៉េរិកនេះ ។
សម្តេចតេជោសែន បានមានប្រសាសន៍ក្នុងហ្វេសប៊ុកថា កិច្ចប្រជុំកំពូលពិសេសអាស៊ាន-អាមេរិក នេះ បានប្រព្រឹត្តក្នុងស្មារតី សាមគ្កីភាពនិងការទទួលខុសត្រូវ ។ សម្តេច និងគណៈប្រតិភូ នឹងអញ្ជើញវិលមកដល់កម្ពុជាវិញ នៅយប់ថ្ងៃទី១៨ ខែកុម្ភៈ ឆ្នាំ ២០១៦ ។
