អគារភ្លោះដែលមានកម្ពស់ខ្ពស់ជាងគេនៅតំបន់អាស៊ី ត្រូវគេគ្រោងនឹងសាងសង់នៅកណ្ដាលរាជធានីភ្នំពេញនិងធ្វើឲ្យរួចរាល់ក្នុងរយៈពេល ៣ឆ្នាំទៅមុខទៀតនេះ ។ អគារភ្លោះមជ្ឈមណ្ឌលពាណិជ្ជកម្មថៃប៊ុនរ៉ុង នឹងមានចំនួន ១៣៣ជាន់ កំពស់ ៥០០ម៉ែត្រ និងក្លាយជាអគារខ្ពស់ជាងគេបង្អស់នៅតំបន់អាស៊ី ។
មន្ទីររៀបចំដែនដីនគរូបនីយកម្ម និងសំណង់ក្រុងភ្នំពេញ បានសម្រេចអនុម័តយល់ព្រមលើគម្រោងសាងសង់អគារភ្លោះនោះហើយ ដែលមានទីតាំងនៅក្នុងមជ្ឈមណ្ឌលកម្សាន្ត ឌ្រីមលែន នៅក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ យោងទៅតាមការស្នើសុំរបស់ក្រុមហ៊ុនបណ្តាក់ទុនវិនិយោគថៃ ប៊ុនរ៉ុង ខូអិលធីឌី ដែលតំណាងដោយ លោកឧកញ៉ា ខូវ សម្បត្តិ និងក្រុមហ៊ុនរបស់ចិន ។
គម្រោងសាងសង់ «អគារភ្លោះមជ្ឈមណ្ឌលពាណិជ្ជកម្មថៃ ប៊ុនរ៉ុង» គ្រោងនឹងចាប់ដំណើរការសាង់សង់នៅដើមឆ្នាំ ២០១៦នេះ លើផ្ទៃដីទំហំ ៥ហិកតា ហើយនឹងចំណាយពេលសាងសង់រយៈ ពេល ៣ឆ្នាំ ដោយបញ្ចប់ក្នុងឆ្នាំ ២០១៩ ។ តាមការសិក្សាវាយតម្លៃជំហានដំបូង ពីក្រុមមន្ត្រីជំនាញគម្រោងវិនិយោគ សំណង់អគារភ្លោះនោះ អាចនឹងត្រូវចំណាយទុនយ៉ាងហោចណាស់ជាង ១ពាន់លានដុល្លារអាម៉េរិក។ គម្រោងនេះ គឺជាគម្រោងដ៏ធំបំផុតនៅអាស៊ី ហើយត្រូវគេរំពឹងថា នឹងបង្ហាញពីមុខមាត់ និងលំនឹងសេដ្ឋកិច្ចកម្ពុជាលើវិស័យសំណង់ ដែលកំពុងមានការរីកចម្រើន និងទាក់ទាញការវិនិយោគថ្មីៗ កាន់តែច្រើនបន្ថែមទៀត។ តាមរបាយការណ៍ សាលារាជធានីភ្នំពេញឲ្យដឹងថា ក្នុងរយៈពេល ១០ឆ្នាំចុងក្រោយនេះ នៅរាជធានីភ្នំពេញ មានសំណង់អគារខ្ពស់ៗ ចាប់ពីកម្ពស់ ៥ជាន់ ដល់លើសពី ៤០ជាន់ឡើងទៅមានចំនួន៦២៨ អគារហើយ ។