ពុទ្ធបរស័ទរាប់ពាន់នាក់ បានជួបជុំគ្នា ប្រារព្ធពិធីបុណ្យមាឃបូជានៅថ្ងៃទី១៥ កើតខែមាឃ ពុទ្ធស័ករាជ ២៥៥៩ នៅលើបរិវេណភ្នំព្រះរាជទ្រព្យ ឬឧត្តុង្គ ក្នុងស្រុកពញាឭ ខេត្តកណ្តាល។
ពិធីបុណ្យមាឃបូជាថ្ងៃច័ន្ទទី២២ ខែកុម្ភៈនេះ បានប្រព្រឹត្តទៅ ដោយមានការចូលរួមពីសម្តេចសង្ឃរាជទាំង២ គណៈនិកាយ និងព្រះសង្ឃពីបណ្តាវត្តនានាចំនួន ៤០០អង្គ ។ ពិធីនេះ បានប្រព្រឹត្តទៅក្រោមអធិបតីភាព សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងមានការចូលរួមផងដែរ ពីរដ្ឋមន្ត្រីក្រសួងធម្មការ និងសាសនា ឯកឧត្តម មិន ឃិន និងអភិបាលខេត្តកណ្តាល ។ មន្ត្រីជាន់ខ្ពស់នៃស្ថាប័នព្រឹទ្ធសភា រដ្ឋសភា និងមន្ត្រីរាជរដ្ឋាភិបាលជាច្រើនរូបទៀត បានអញ្ជើញចូលរួមផងដែរ។
ពិធីបុណ្យមាឃបូជា ត្រូវបានប្រារព្ធជារៀងរាល់ឆ្នាំនៅថ្ងៃទី ១៥កើត ខែមាឃ ដែលក្នុងបំណងរំឭដល់ព្រឹត្តិការណ៍សំខាន់ៗ នៅក្នុងព្រះពុទ្ធសាសនា នោះគឺៈ
ទី១- រំឭកដល់ថ្ងៃចតុរង្គសន្និបាត នៃព្រះភិក្ខុសង្ឃទាំង ១២៥០អង្គ នាថ្ងៃ១៥កើត ខែមាឃ
ទី២- រំឭកដល់ថ្ងៃព្រះសម្មាសម្ពុទ្ធ ដែលទ្រង់បានដាក់អាយុសង្ខារ… និងនៅថ្ងៃ១៥កើត ខែមាឃនេះផងដែរ គឺជាថ្ងៃដែលព្រះពុទ្ធព្រះបរមគ្រូបានត្រាស់ដឹងផងដែរ ។
បុណ្យមាឃបូជា បានធើ្វនៅតាមបណ្តាវត្តទូទាំងប្រទេសកម្ពុជា ដែលតាមវត្តនីមួយៗ មានការដោតទង់ជ្វាលាតាមប្រពៃណីពុទ្ធសាសនាផងដែរ ។
