កិច្ចប្រជុំរដ្ឋមន្ត្រីការបរទេសអាស៊ានចង្អៀត ក្នុងក្រុងវៀងច័ន្ទបានបញ្ចប់ ដោយអាស៊ានបានឯកភាពពង្រឹងនូវតួនាទីស្នូល ដែលមិនត្រូវចូលរួមក្នុងយុទ្ធសាស្ត្រសកល របស់ប្រទេសមហាអំណាចណាមួយទេ ។ សេចក្តីប្រកាសព័ត៌មានមួយរបស់ក្រសួងការបរទេសកម្ពុជា បានសរសេរថា អាស៊ានចាំបាច់ត្រូវពង្រឹងតួនាទីស្នូល ASEAN centrality និងការឯកភាព Unity ក្នុងការធ្វើទំនាក់ទំនងជាមួយនឹងប្រទេសមហាអំណាចនានា ជាពិសេស ចិន អាម៉េរិក និងរុស្ស៊ី ។
ឯកឧត្តមឧបនាយករដ្ឋមន្ត្រី ហោ ណាំហុង បានថ្លែងថា អាស៊ានមិនត្រូវចូលរួមក្នុងយុទ្ធសាស្ត្រសកលរបស់ប្រទេសមហាអំណាចណាមួយនោះឡើយ ។ សេចក្តីប្រកាសព័ត៌មានរបស់ក្រសួងការបរទេសកម្ពុជាដដែលបានឱ្យដឹងថា កិច្ចប្រជុំរដ្ឋមន្ត្រីការបរទេសអាស៊ានចង្អៀតបានពិភាក្សាផងដែរ លើការអនុវត្តចក្ខុវិស័យ សហគមន៍អាស៊ានឆ្នាំ ២០២៥… ការអនុវត្តផែនការលំអិតរបស់សហគមន៍សន្តិសុខ និងនយោបាយអាស៊ាន ទំនាក់ទំនងក្រៅតំបន់ បញ្ហាសមុទ្ទចិនខាងត្បូង បញ្ហាឧបទ្វីបកូរ៉េ បញ្ហាភេរវកម្ម និងក្រុមជ្រុលនិយមអាយស៊ីស និងអាយអេស ផងដែរ ។
ឯកឧត្តមឧបនាយករដ្ឋមន្រ្តី ហោ ណាំហុង បានស្នើអាស៊ានឱ្យពិចារណាការតភ្ជាប់អាស៊ាន… ការកាត់បន្ថយភាពក្រីក្រ… ការចូលរួមរបស់យុវជនអាស៊ាន ក្នុងការកសាងសហគមន៍អាស៊ាន ដោយយុវជនមានតួនាទីសំខាន់ក្នុងការអភិវឌ្ឍប្រទេសជាតិ និងដោយយុវជនមានចំនួនប្រមាណជាង ៣៥% នៃប្រជាជនកម្ពុជាទាំងមូល និងប្រមាណ ៦០% នៃប្រជាជនអាស៊ានសរុបចំនួន ៦២៥លាននាក់… ការត្រៀមខ្លួន និងការឆ្លើយតបទៅនឹងការប្រែប្រួលអាកាសធាតុ និងការសំរេចបានពេញលេញនូវការអនុត្តផែនការការងារទី៣ នៃគំនិតផ្តួចផ្តើមសម្រាប់សមាហរណកម្មអាស៊ាន នៅពេលដែលផែនការនេះ ត្រូវបានអនុម័តដោយថ្នាក់ដឹកនាំអាស៊ាននៅខែកញ្ញាឆ្នាំ ២០១៦ ខាងមុខនេះ ។
គួរកត់សម្គាល់ថា កិច្ចប្រជុំរដ្ឋមន្ត្រីការបរទេសអាស៊ានចង្អៀត ក្នុងក្រុងវៀងច័ន្ទរយៈពេល ២ថ្ងៃ ដែលបង្ហាញជំហរឯករាជ្យនេះ បានប្រព្រឹត្តទៅក្រោយកិច្ចប្រជុំកំពូលរវាងមេដឹកនាំអាស៊ាន និងអាម៉េរិករួចកាលពី ខែកុម្ភៈ កន្លងមកនេះ ក្នុងរដ្ឋកាលីហ្វ័រនីញ៉ាសហរដ្ឋអាម៉េរិក។
