មេដឹកនាំក្រុមយុវជន បណ្ឌិត ហ៊ុន ម៉ាណែត បានមានប្រសាសន៍នៅក្នុងពិធីសម្ពោធផ្ទះគំរូ និងបើកការដ្ឋានសាងសង់អាគារកម្ពស់ ៣៩ជាន់ នៃមជ្ឍមណ្ឌល The Gateway នៅរាជធានីភ្នំពេញ កាលពីថ្ងៃទី ២៨ ខែកុម្ភៈ ឆ្នាំ ២០១៦ ដោយមានការចូលរួមពីសំណាក់ពាណិជ្ជករជាតិ អន្តរជាតិជាច្រើននាក់ផងដែរ ថា វិស័យវិនិយោគឯកជនគឺជាផ្នែកមួយមិនអាចខ្វះបាន ក្នុងការរួមចំណែកកាត់បន្ថយភាពក្រីក្ររបស់ប្រជាជន ។ សេដ្ឋកិច្ចនៃប្រទេសមួយអាចមានលំនឹងរីកលូតលាស់ទៅបាន គឺអាស្រ័យកត្តាច្រើនយ៉ាង ដែលនៅក្នុងនោះវិស័យវិនិយោគឯកជនគឺជាផ្នែកមួយដែលត្រូវតែជម្រុញ និងមិនអាចខ្វះបាន ក្នុងការរួមចំណែកកាត់បន្ថយភាពក្រីក្ររបស់ប្រជាជន ។
កម្ពុជាបានអនុម័តច្បាប់ និងលក្ខខណ្ឌមួយចំនួន ដើម្បីសម្រួលដល់ការបើកចំហសេដ្ឋកិច្ចឱ្យកាន់តែល្អប្រសើរ និងលើកទឹកចិត្តដល់វិនិយោគបរទេស ហើយបច្ចុប្បន្ននេះ កម្ពុជាគឺជាប្រទេសដែលបានផ្តល់នូវរបបវិនិយោគសេរី និងអនុគ្រោះពន្ធលើកទឹកចិត្តច្រើនជាងគេនៅអាស៊ីអាគ្នេយ៍ ដែលការវាយតម្លៃរបស់ធនាគាពិភពលោក កម្ពុជាគឺជាប្រទេសដែលជាប់ចំណាត់លេខ១០ ក្នុងចំណោមបណ្តាប្រទេសចំនួន១៧០ លើកំណើនសេដ្ឋកិច្ចល្អបំផុតក្នុងទស្សវត្សកន្លងទៅ ។
អាគារកម្ពស់ ៣៩ជាន់ នៃមជ្ឈមណ្ឌល The Gateway ដែលកំពុងសង់នាឱកាសនេះ គឺជានិមិត្តរូបក្នុងភាពរីកលូតលាស់នៃវិស័យឯកជនថ្មីមួយថែមទៀត ដែលរាជរដ្ឋាភិបាលតែងតែចាត់ទុកវិស័យនេះ ជាក្បាលម៉ាស៊ីននៃកំណើនសេដ្ឋកិច្ចជាតិ ក្នុងគោលដៅជម្រុញសកម្មភាពសេដ្ឋកិច្ច ការបង្កើតទីផ្សារការងារនិងការលើកម្ពស់ប្រាក់ចំណូលជូនប្រជាជន ។
