មនុស្សដែលកើតជម្ងឺមហារីកក្នុងប្រទេសកម្ពុជា នឹងអាចមានលទ្ធភាពព្យាបាលហើយ ដោយនាពេលនេះ កម្ពុជាមានឧបករណ៍ម៉ាស៊ីនថ្មីលើកដំបូងបង្អស់ អាចសម្លាប់មេរោគមហារីកបានដោយ សក្តិសិទ្ធិ ។
អគារព្យាបាលជំងឺមហារីក Bunker Room និងម៉ាស៊ីនព្យាបាលជំងឺមហារីក Accelerator ត្រូវគេនិយាយថា គឺជាម៉ាស៊ីនព្យាបាលជំងឺមហារីកដោយកាំរស្មីថ្មីបំផុតលើកទី១ ដែលកម្ពុជាទើបនឹងមានលើកដំបូង… តម្លៃសរុប១.៤៩៦.០០០ ដុល្លារអាម៉េរិក និងត្រូវបានដាក់ឲ្យដំណើរការព្យាបាលជំងឺមហារីក នៅមន្ទីរពេទ្យមិត្តភាពខ្មែរ-សូវៀត ។
ពិធីសម្ពោធដាក់ឲ្យដំណើរការ បានធ្វើឡើងនៅព្រឹកថ្ងៃទី២ ខែមិនា ក្រោមអធិបតីភាពរដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ម៉ម ប៊ុនហេង ដោយមានការចូលរួមពីតំណាងអង្គការដៃគូ និងមន្ត្រីសុខាភិបាលជាច្រើនទៀត ។ ប្រធានមន្ទីរពេទ្យមិត្តភាពខ្មែរ-សូវៀត លោកវេជ្ជបណ្ឌិត ងី ម៉េង បានថ្លែងថាក្នុងឆ្នាំ ២០១៥ មន្ទីរពេទ្យមិត្តភាពខ្មែរ-សូវៀតបានពិនិត្យ និងព្យាបាលជំងឺបានជាង ១៩ម៉ឺន ៨ពាន់នាក់ ទទួលអ្នកជំងឺសម្រាកពេទ្យ ជាង ២ម៉ឺន ៧ពាន់នាក់ ។ លោកថា ផ្នែកជំងឺមហារីកបានបើកឲ្យដំណើរការនៅឆ្នាំ ២០០៣ ដែលមានបុគ្គលិក ៣៥នាក់ និងក្នុងឆ្នាំ ២០១៥ មន្ទីរពេទ្យបានទទួលពិនិត្យ និងព្យាបាលជំងឺមហារីកដោយកាំរស្មីចំនួន ១.៤៨៣នាក់ ដែលមានការកើនឡើងពីមួយឆ្នាំទៅមួយឆ្នាំ ។ រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ម៉ម ប៊ុនហេង បានថ្លែងថា តាមរយៈអគារ និងម៉ាស៊ីនថ្មីនេះ គឺនឹងជួយសម្រួលដល់ការព្យាបាលជំងឺមហារីកនៅកម្ពុជា កាន់តែប្រសើរ និងមានប្រសិទ្ធភាពជាងមុន ជាមួយនឹងឧបករណ៍សម្ភារៈទំនើបៗនេះ នឹងធ្វើឲ្យមន្ទីរពេទ្យមានលទ្ធភាពផ្ដល់សេវាកាន់តែមានប្រសិទ្ធិភាពខ្ពស់ ជូនដល់ប្រជាពលរដ្ឋដែលមានជំងឺមហារីក ។
ម៉ាស៊ីន Accelerator គឺជាម៉ាស៊ីនព្យាបាលជំងឺមហារីក ដោយកាំរស្មីថ្មីបំផុតទី១ ក្នុងប្រទេសកម្ពុជា… សាងសង់ និងបំពាក់ដោយក្រុមហ៊ុន Neusoft និងក្រុមហ៊ុន Envisioning Co, Ltd ពីដើមឆ្នាំ ២០១៥ ហើយបានរួចរាល់ជាស្ថាពរនៅដំណាច់ឆ្នាំ ២០១៥ ។ ក្រុមបច្ចេកទេសបានឲ្យដឹងថា ក្រុមហ៊ុន Neusoft ជាក្រុមហ៊ុនលំដាប់ពិភពលោករបស់ប្រទេសចិន ដែលមានបច្ចេកវិទ្យាទំនើបផ្នែកបរិក្ខាពេទ្យ ជាពិសេសម៉ាស៊ីន Accelerator ស៊ីធីស្កែន CT Scan និង MRI។
