ភាពធ្លាប់តែរិះគន់ខ្លះទៅលើសមត្ថកិច្ចចរាចរណ៍ ត្រូវគេឃើញថាបានទម្លាក់ចោលទាំងអស់នៅថ្ងៃនេះដោយសារតែការអាណិតអាសូរនឹងមន្ត្រីនគរបាលចរាចរណ៍ម្នាក់ ដែលធ្វើការបំរើជាតិរហូតដល់ស្លាប់ដោយសារការដួលដេកខ្យល់គរ ពេលកំពុងបំពេញការងារ ។
មរណភាពក្នុងការបំពេញភារកិច្ច របស់មន្ត្រីនគរបាលសណ្តាប់ធ្នាប់ចរាចរណ៍ លោកអនុសេនីយ៍ យ៉ា បូរ៉ា នៃខណ្ឌ ៧មករា កាលពីរសៀលដ៏ក្តៅហួតហែង នៃថ្ងៃអាទិត្យទី១៣ ខែមករា ត្រូវគេឃើញបានស្ថិតក្នុងការសរសេរលើទំព័រហ្វេសប៊ុកមនុស្សនានា សូម្បីតែហ្វេសប៊ុករបស់ សម្តេចនាយករដ្ឋមន្ត្រី ដែលសរសេរបង្ហាញការកោតគោរពសរសើរអំពីវីរភាព ។
សម្តេចតេជោសែន បានសរសេរថា យើងទាំងអស់គ្នាពិតជាសោកស្តាយពន់ពេក ចំពោះការបាត់បង់ លោក យ៉ា បូរ៉ា ដែលជាមន្រ្តីនគរបាលផ្នែកសណ្តាប់ធ្នាប់ នៃអធិការដ្ឋាននគរបាលខ័ណ្ឌ ៧មករា កាលពីម្សិលមិញ ក្នុងពេលបំពេញភារកិច្ចថែ រក្សាការពារសុវត្ថិភាពចរាចរណ៍សាធារណៈ ។ សម្តេចបានសរសេរថា អ្វីដែលយើងចងចាំទាំងអស់គ្នា គឺ លោក យ៉ាន់ បូរ៉ា តែងតែរំឭក និងប្រាប់ដល់កូនចៅទាំងអស់ឱ្យពាក់មួកការពារសុវត្ថិភាព និងគោរពច្បាប់ចរាចរណ៍គ្រប់ៗពេល ។
នៅក្នុងគេហដ្ឋានរបស់ក្រុមគ្រួសាររបស់ លោក យ៉ា បូរ៉ា មនុស្សជាច្រើន បានអញ្ជើញចូលរួមវិញ្ញាណក្ខ័ន្ធសព រួមទាំងតំណាងថ្នាក់ដឹកអគ្គស្នងការដ្ឋាននគរបាលជាតិ… តំណាងក្រុមចលនាយុវជន១៥៧… តំណាងសាលារាជធានី… តំណាងខ័ណ្ឌ និងតំណាងអង្គភាពផ្សេងៗផងដែរ ។
លោក យ៉ា បូរ៉ា បានបាត់បង់ជីវិតទៅ បន្សល់ទុកភរិយានិងកូន ៤នាក់ ក្នុងនោះរួមមានស្រី ២នាក់ ប្រុស ២នាក់ ។ សេចក្តីរាយការណ៍បានអោយដឹងថា កូនប្រុសរបស់លោក នឹងត្រូវគេអនុញ្ញាតអោយចូលបំរើការជានគរបាល ដើម្បីស្នងបន្តពីឪពុក ។
