ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានបញ្ជាក់ថា ការមិនទទួលស្គាល់ទិវាជ័យជំនះ ៧មករា គឺមានន័យថា ស្រឡាញ់របបប្រល័យពូជសាសន៍ និងសង្គ្រាម។
ការបញ្ជាក់របស់ ឯកឧត្តម សាយ សំអាល់ បានធ្វើឡើងក្នុងឱកាសលោកអញ្ជើញជាអធិបតីក្នុងពិធីអបអរសាទរខួបលើកទី៤៤ នៃទិវាជ័យជម្នះ ៧មករា (១៩៧៩-២០២៣) នៅខេត្តព្រះសីហនុ នាថ្ងៃទី១៥ ខែមករា ឆ្នាំ២០២៣។ ពិធីនេះ ក៏មានការអញ្ជើញចូលរួមពីលោក លោកស្រី ជាសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងាររាជរដ្ឋាភិបាលចុះមូលដ្ឋានក្រុង ស្រុក ឃុំសង្កាត់លោក គួច ចំរើន អភិបាលខេត្តព្រះសីហនុ និងប្រជាពលរដ្ឋជិត១ពាន់នាក់។
ឯកឧត្តម សាយ សំអាល់ បានឱ្យដឹងទៀតថា ទិវាជ័យជម្នះ ៧មករា មិនត្រឹមតែជាថ្ងៃរំឭកដល់ថ្ងៃរំដោះជាតិ និងប្រជាជនពីរបបប្រល័យពូជសាសន៍ ប៉ុល ពត ប៉ុណ្ណោះទេ ក៏ប៉ុន្តែ គឺជាសច្ចធម៌ប្រវត្តិសាស្រ្តមួយ ដែលដាស់តឿនពលរដ្ឋកម្ពុជាគ្រប់ៗជំនាន់ ដើម្បីកុំឱ្យត្រឡប់មកជាន់ដានប្រវត្តិសាស្រ្តដ៏ខ្មៅងងឹតនេះម្ដងទៀត។
ឯកឧត្តម សាយ សំអាល់ បានបន្ថែមថា កត្តាសុខសន្តិភាព ស្ថេរភាពនយោបាយ និងលំនឹងម៉ាក្រូសេដ្ឋកិច្ច បានធ្វើឱ្យមានការប្រែប្រួលរចនាសម្ព័ន្ធសេដ្ឋកិច្ចគួរឱ្យកត់សម្គាល់ តួយ៉ាង កម្ពុជាបានងាកចេញពីការពឹងផ្អែកទាំងស្រុងលើវិស័យកសិកម្ម និងធនធានធម្មជាតិ មកផ្ដោតលើវិស័យឧស្សាហកម្ម និងសេវាកម្មជាដើម ដោយបានបង្កើតការងារជាច្រើន និងលើកកម្ពស់នូវជីវភាពរបស់ប្រជាពលរដ្ឋ។
ឯកឧត្តមបានសង្កត់ធ្ងន់ថា យើងមានថ្ងៃនេះ ដោយសារតែយើងមានឯកភាពជាតិ សាមគ្គីភាពជាធ្លុងមួយរបស់ប្រជាពលរដ្ឋគ្រប់មជ្ឈដ្ឋាន មន្ត្រីរាជការ កងកម្លាំងប្រដាប់អាវុធគ្រប់ប្រភេទ ដែលបានរួបរួមគ្នាថែរក្សាសុខសន្តិភាព ក្រោមការដឹកនាំប្រកបដោយគតិបណ្ឌិតរបស់វីរៈមគ្គុទេសក៍នៃកម្ពុជា សម្តេចតេជោសែន៕
