សម្តេចតេជោសែន នាយករដ្ឋមន្ត្រី បានមានប្រសាសន៍ព្រមានការប្រើប្រាស់យុទ្ធសាស្ត្រ «៣មិន» ដែលគណបក្សនយោបាយមួយបានប្រើប្រាស់ ក្នុងការទប់ទប់នឹងរឿងអាស្រូវស្នេហា ។
គួររំលឹកថា មេដឹកនាំគណបក្សសង្គ្រោះជាតិ ឯកឧត្តម កឹម សុខា ក្នុងការគេចវេសមិនឆ្លើយជាមួយនឹងក្រុមយុវជនគាំទ្រ និងក្រុមអ្នកកាសែត ដែលចង់ដឹងអំពីរឿងសង្ស័យពាក់ព័ន្ធអាស្រូវស្នេហា ក្បត់សីលធម៌ភាពជាអ្នកដឹកនាំ បានដាក់ចេញនូវយុទ្ធសាស្ត្រ ៣មិន គឺៈ មិនឆ្លើយ… មិនឆ្លង… និងមិនឈ្លោះ ។
គណបក្សសង្គ្រោះជាតិ ទើបបានចេញសេចក្តីថ្លែងការណ៍មួយ បន្តធ្វើគថ្លង់ចំពោះហេតុការណ៍ដែលជាប់ពាក់ព័ន្ធនឹងរឿងចោទប្រកាន់អាស្រូវស្នេហារបស់ ឯកឧត្តម កឹម សុខា ។ សេចក្តីប្រកាសព័ត៌មានមួយចុះថ្ងៃទី១៥ ខែមីនា ឆ្នាំ ២០១៦ របស់គណបក្សសង្គ្រោះជាតិ ដែលបានប្រជុំនៅក្នុងក្រុងម៉ានីល នៃប្រទេសហ្វីលីពីន បានសរសេរថា គណបក្សសង្គ្រោះជាតិ នឹងរក្សាភាពស្ងៀមស្ងាត់ដោយមិនឆ្លើយ… មិនឆ្លង… និងមិនឈ្លោះ… ហើយគិតតែការផ្តោតតែទៅលើដំណើរការបោះឆ្នោតឆ្នាំ ២០១៧ និង ២០១៨ ។
នៅជាមួយគ្នានោះដែរ មន្ត្រីគណបក្សសង្គ្រោះជាតិ បានចោទថារឿងអាស្រូវស្នេហារបស់ ឯកឧត្តម កឹម សុខា គឺជារឿងនយោបាយថែមទៀត ។ សម្តេចតេជោសែន បានមានប្រសាសន៍ថា រឿងដែលតូច បានក្លាយជារឿងធំហើយនាពេលនេះ ។ រឿងចោទប្រកាន់អាស្រូវរបស់ ឯកឧត្តម កឹម សុខា កំពុងស្ថិតក្នុងការពិចារណារបស់រដ្ឋសភា ហើយនាពេលនេះ បន្ទាប់ពីក្រុមយុវជន និងនិស្សិត បានយកញ្ញត្តិមួយប្រគល់ទៅរដ្ឋសភាថ្មីៗនេះ ។
ញ្ញត្តិរបស់ក្រុមយុវជន និងនិស្សិត បានទទូចដល់ សម្តេចអគ្គមហាពញាចក្រី ហេង សំរិន ប្រធានរដ្ឋសភា កោះហៅ ឯកឧត្តម កឹម សុខា ដើម្បីបកស្រាយការពិតរឿងខ្សែអាត់នៃសម្លេងសន្ទនាសាសងស្នេហាជាមួយស្ត្រីក្មេងៗច្រើននាក់ ដែលពួកគេចាត់ទុកថា ជាទង្វើអាស្រូវគួរឱ្យខ្មាស់អៀន ដែលមិនត្រូវកើតមានចំពោះបេក្ខជននយោបាយឈរឈ្មោះជាតំណាងរាស្ត្រ និងអ្នកតំណាងបក្សដែលចង់ដឹកនាំប្រទេសជាតិនាពេលបោះឆ្នោតខាងមុខនោះឡើយ ។
