រដ្ឋាភិបាលជប៉ុន បានចុះហត្ថលេខាជាមួយរដ្ឋាភិបាលកម្ពុជា នៅល្ងាចមិញនេះ លើការផ្តល់ជំនួយហិរញ្ញប្បទានឥតសំណង និងឥណទានសម្បទាន ដែលមានតម្លៃសរុប ២ម៉ឺន ២០១៣លានយ៉េន ស្មើនឹងជាង ១៩៧លានដុល្លារអាម៉េរិក ។ ការចុះហត្ថលេខាផ្តល់ប្រាក់ជំនួយជាង ១៩៧លានដុល្លារអាម៉េរិកនេះ បានប្រព្រឹត្តទៅនៅក្រសួងការបរទេសកម្ពុជា រវាងឯកឧត្តមរដ្ឋមន្ត្រីក្រសួងការបរទេសកម្ពុជា និងឯកអគ្គរដ្ឋទូតជប៉ុន ប្រចាំកម្ពុជា ឯកឧត្តម យូជិ គូម៉ាម៉ារុ ដោយមានវត្តមានដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ។ អនុរដ្ឋមន្ត្រីក្រសួងការបរទេសជប៉ុន ឯកឧត្តម ម៉ាសាកាស៊ូ ហាម៉ាជី ដែលកំពុងទស្សនកិច្ចកម្ពុជា ក៏មានវត្តមានក្នុងឱកាសនោះផងដែរ ។
មន្ត្រីអ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានបញ្ជាក់ថា ក្នុងប្រាក់ជំនួយ ២ម៉ឺន ២០១៣លានយ៉េន គឺប្រាក់ហិរញ្ញប្បទានឥតសំណងមានចំនួន ៤៧១៥លាន សម្រាប់គម្រោងធ្វើអោយប្រសើរនូវស្ពានជ្រោយចង្វារ និងជំនួយសម្ភារៈបច្ចេកទេសបោសសំអាតមីន ដំណាក់កាលទី៧ ។ ចំណែកជំនួយឥណទានសម្បទានវិញ មានចំនួន ១ម៉ឺន ៧ពាន់ ២៩៨លានយ៉េន សម្រាប់គម្រោងធ្វើឱ្យប្រសើរផ្លូវជាតិលេខ៥ ពីកំណាត់ផ្លូវព្រែកក្តាម រាជធានីភ្នំពេញ ដល់ ធ្លាម្អម ស្រុកក្រគរខេត្តពោធិសាត់ ដំណាក់កាលទី២ ។
