កម្ពុជាកំពុងជម្រុញការបណ្តុះបណ្តាលធនធានមនុស្សល្អ និងមនុស្សមានសមត្ថភាព ក្នុងដំណាក់កាលទី៣ នៃការកែទម្រង់គ្រប់គ្រងហិរញ្ញវត្ថុសាធារណៈ ។
គួរកត់សម្គាល់ថា កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ បានចាប់ផ្តើមដំណាក់កាលទី១ តាំងឆ្នាំ ២០០៤ ដោយផ្តោតលើការពង្រឹងភាពជឿជាក់លើថវិកា… ដំណាក់កាលទី២ ផ្តោតលើការបង្កើនគណនេយ្យភាព ការព្យាករណ៍ចំណូលចំណាយអោយមានភាពសុក្រិត្យ និងដំណាក់កាលទី៣ គឺការផ្សារភ្ជាប់ថវិកា ទៅនឹងគោលនយោបាយ ។
នៅព្រឹកថ្ងៃទី២១ ខែមីនានេះ ពិធីប្រកាសដាក់ឱ្យអនុវត្តដំណាក់កាលទី៣ និងកិច្ចប្រជុំត្រួតពិនិត្យវាយតម្លៃវឌ្ឍនភាពប្រចាំឆ្នាំ ២០១៥ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈនៅកម្ពុជា បានប្រព្រឹត្តទៅក្រោមការរៀបចំក្រសួងសេដ្ឋកិច្ច និងហិរញ្ញវត្ថុ នៅសណ្ឋាគារសូហ្វីតែល រាជធានីភ្នំពេញ ។ សម្តេចតេជោសែន បានអញ្ជើញចូលរួមជាអធិបតីដ៏ខ្ពង់ខ្ពស់ ក្នុងពិធីនៅព្រឹកមិញនេះ និងមានប្រសាសន៍ថា គោលបំណងនៃកម្មវិធីនេះ គឺជាការស្វែងរកធាតុចូលបន្ថែម សំរាប់ជាមូលដ្ឋាននៃការរៀបចំផែនការសកម្មភាពជំហានបន្ទាប់ នៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ និងដើម្បីតាមដានវឌ្ឍនភាពការងារកែទម្រង់ ។
សម្តេចបានមានប្រសាសន៍ថា ថវិកាគឺជាឧបករណ៍នៃគោលនយោបាយ ។ សម្តេចតេជោសែន បានផ្តល់អនុសាសន៍ ៤ចំណុច ដែលជាគន្លឹះនៃវិធានការណ៍ជាក់ស្តែង គឺការបន្តខិតខំកសាងលើកកំពស់ភាពជាអ្នកដឹកនាំ និងបង្កើនឆន្ទៈ និងស្ថាបនាភាពជាម្ចាស់… ការពង្រឹងសមត្ថភាពធនធានមនុស្ស ពង្រឹងគណនេយ្យភាពរបស់មន្ត្រីរាជការគ្រប់លំដាប់ថ្នាក់… បន្តលើកកំពស់ស្មារតីនៃការពិភាក្សា ការសម្របសម្រួល និងកិច្ចសហការទាំងក្នុងក្របខ័ណ្ឌផ្ទៃក្នុងក្រសួង និងស្ថាប័ននីមួយៗ… និងត្រូវខិតខំអនុវត្តប្រកបដោយប្រសិទ្ធិភាពនូវសារាចរលេខ០៩ថ្ងៃ៨ ធ្នូ ឆ្នាំ ២០១៥ ស្តីពីវិធាន និងនិតិវិធីនៃការរៀបចំ ការអនុវត្តន៍ តារត្រួតពិនិត្យ តាមដាន និងការ វាយតម្លៃលើការងារកែទម្រង់ការគ្រប់គ្រងហិរញ្ញវត្ថុសាធារណៈដែលបានដាក់ចេញដោយរាជរដ្ឋាភិបាល។