(ប៉េកាំង, ចិន)៖ ប្រធានរដ្ឋឡាវ ឯកឧត្តម ថងលុន ស៊ីសូលីត បានគាំទ្រគំនិតផ្តួចផ្តើមកិច្ចសហប្រតិបត្តិការទេសចរណ៍ត្រីភាគី (កម្ពុជា-ឡាវ-វៀតណាម) «ប្រទេសបី គោលដៅតែមួយ (Three Countries One Destination)» ដើម្បីជំរុញវិស័យទេសចរណ៍រវាងប្រទេសទាំង៣។
គំនិតផ្តួចផ្តើមនេះ ត្រូវបានលើកឡើងដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅក្នុងជំនួបជាមួយឯកឧត្តម ថងលុន ស៊ីសូលីត នាព្រឹកថ្ងៃព្រហស្បតិ៍ ទី១៩ ខែតុលា ឆ្នាំ២០២៣នេះ នៅរដ្ឋធានីប៉េកាំង ប្រទេសចិន ទីដែលសម្តេចធិបតី និងប្រមុខរដ្ឋឡាវ អញ្ជើញចូលរួមវេទិកា «ខ្សែក្រវាត់និងផ្លូវ» លើកទី៣។
ក្នុងជំនួបនោះ ឯកឧត្តម ថងលុន ស៊ីសុលីត បានបង្ហាញនូវក្តីរីករាយចំពោះជំនួបជាមួយសម្តេចធិបតី នៅរដ្ឋធានីប៉េកាំងនាឱកាសនេះ ព្រមទាំងបានសម្តែងការអបអរសាទរជូនសម្តេចធិបតី ទទួលបានការគាំទ្រដឹកនាំរាជរដ្ឋាភិបាលក្នុងនីតិកាលថ្មី។
ប្រមុខរដ្ឋរបស់ឡាវ ក៏បានបង្ហាញការជឿជាក់ថា ក្រោមការដឹកនាំរបស់សម្តេចធិបតី ទំនាក់ទំនងរវាងកម្ពុជា-ឡាវ នឹងកាន់តែរីកចម្រើនទៅមុខ។ ឯកឧត្តម ថងលុន ស៊ីសូលីត បានសម្តែងការអបអរសាទរផងដែរ ចំពោះជោគជ័យរបស់កម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤០ និង៤១ ព្រមទាំងកិច្ចប្រជុំកំពូលពាក់ព័ន្ធក្នុងឆ្នាំ២០២២ ក៏ដូចជាព្រឹត្តិការណ៍ប្រកួតកីទ្បាអាស៊ីអាគ្នេយ៍លើកទី៣២ និងការប្រកួតកីឡាអាស៊ានប៉ារ៉ាហេ្គមលើកទី១២ នៅក្នុងឆ្នាំ២០២៣។
ជាការឆ្លើយតប សម្តេចធិបតី ហ៊ុន ម៉ាណែត បានថ្លែងអំណរគុណចំពោះឱកាសនៃជំនួបនេះ និងបានវាយតម្លៃខ្ពស់ចំពោះវឌ្ឍនភាពរីកចម្រើននៃកិច្ចសហប្រត្តិការលើគ្រប់វិស័យរវាងប្រទេសទាំងពីរ ដែលសម្រេចបានកន្លងមក។
ចំពោះទិសដៅទៅមុខ សម្តេចធិបតី ហ៊ុន ម៉ាណែត បានគាំទ្រការបន្តអនុវត្តន៍ «លំហាត់រួមត្រីភាគី ស្តីពីការសង្គ្រោះគ្រោះមហន្តរាយកម្ពុជា-ឡាវ-វៀតណាម» ដូចដែលបានរៀបចំឡើងកាលពីខែកញ្ញា ឆ្នាំ២០២២កន្លងទៅ។
សម្តេចធិបតីនាយករដ្ឋមន្ត្រី ក៏បានលើកឡើងគំនិតផ្តួចផ្តើមមួយចំនួនពាក់ព័ន្ធការជំរុញកិច្ចសហប្រតិបត្តិការក្នុងវិស័យទេសចរណ៍ តាមរយៈការដាក់ចេញនូវកិច្ចសហប្រតិបត្តិការទេសចរណ៍ត្រីភាគី (កម្ពុជា-ឡាវ-វៀតណាម) «ប្រទេសបី គោលដៅតែមួយ (Three Countries One Destination)» និងការភ្ជាប់ជើងហោះហើរត្រង់ ភ្នំពេញ-វៀងច័ន្ទន៍-ភ្នំពេញ។
បន្ថែមពីលើនោះ ថ្នាក់ដឹកនាំប្រទេសទាំងពីរបានធ្វើការវាយតម្លៃខ្ពស់ចំពោះសមិទ្ធផលនៃ «ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង» ដែលត្រូវបានបង្កើតឡើងចាប់តាំងពីឆ្នាំ២០១៩មក និងបានឯកភាពបន្តពង្រឹង និងពង្រីកកិច្ចសហប្រតិបត្តិការលើវិស័យមួយចំនួន ជាអាទិ៍៖ វិស័យការពារជាតិ, អប់រំ, ថាមពល, ការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ និងគំនិតផ្តួចផ្តើមរបស់ សម្តេចធិបតី ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី (កម្ពុជា-ឡាវ-វៀតណាម) «ប្រទេសបី គោលដៅតែមួយ (Three Countries One Destination)»។
ក្នុងជំនួបនោះប្រធានរដ្ឋឡាវ បានអញ្ជើញ សម្តេចធិបតី ហ៊ុន ម៉ាណែត ទៅបំពេញទស្សនកិច្ចផ្លូវការនៅក្នុងប្រទេសឡាវ។ សម្តេចធិបតី បានទទួលយកការអញ្ជើញនេះប្រកបដោយក្តីសោមន្សរីករាយ ហើយនឹងកំណត់យកកាលបរិច្ឆេទសមស្របណាមួយនាពេលខាងមុខ ដើម្បីទស្សនកិច្ចនៅឡាវ៕
