អភិបាលស្រុកស៊ីធរកណ្តាល អញ្ចើញចូលរួមជាគណៈអធិបតី ក្នុងពិធីប្រគល់ និងទទួល អាគារមណ្ឌលសុខភាព ឃុំល្វេ


ព្រឹកថ្ងៃទី ២៦ ខែសីហា ឆ្នាំ២០១៧នេះ លោកម៉ននី​ បណ្ឌិត​ អភិបាល​ នៃគណៈអភិបាលស្រុកស៊ីធរកណ្តាល បានអញ្ចើញចូលរួមជាគណៈអធិបតី ក្នុងពិធីប្រគល់ និងទទួល អាគារមណ្ឌលសុខភាព ឃុំល្វេ ដែលជាអំណោយឧបត្ថម្ភ របស់អង្គការភូមិសន្តិភាពអរន្តជាតិ ប្រទេសអាឡឺម៉ង់ និង ដោយមានការអញ្ចើញចូលរួមពី លោកអភិបាលរងស្រុក, តំណាង អង្គការភូមិសន្តិភាពអរន្តជាតិ ប្រទេសអាឡឺម៉ង់, ប្រធានការិយាល័យសុខាភិបាល ស្រុកប្រតិបត្តិ និងសហការី, ប្រធានមណ្ឌលសុខភាពទាំង១១ ក្នុងស្រុកស៊ីធរកណ្ដាល, អាជ្ញាធរឃុំ ប្រធានភូមិទាំងអស់ ក្នុងឃុំល្វេ ។

លោកម៉ននី​ បណ្ឌិត​ បានបញ្ជាក់ថា​ នេះជាអាគារទី០៤ ហើយដែលអង្គការភូមិសន្តិភាពអរន្តជាតិ ប្រទេសអាឡឺម៉ង់ បានផ្ដល់ជូនស្រុកស៊ីធរកណ្ដាល តាមរយៈការសាងសង់មណ្ឌលសុខភាព​ តាមបណ្តាលឃុំ​ ៤រួចទៅហើយហើយបន្ថែមពីនេះ អង្គការភូមិសន្តិភាពអរន្តជាតិ ប្រទេសអាឡឺម៉ង់ បានបំពាក់នៅគ្រឿង​ សំភារៈពេទ្យមួយចំនួនទៀត​ ដើម្បីសំរួលដាក់បងប្អូន​ អ៊ុំពូមីងដែលមករកសេវាសុខាភិបាល​ នៅឃុំល្វេ​ ស្រុកសីុធរកណ្តាលនេះ​ ។

ជាមួយគ្នានេះ យើងឃើញថា ប្រជាពលរដ្ឋនៅក្នុងឃុំល្វេ ក៏ដូចជាប្រជាពលរដ្ឋក្នុងស្រុកស៊ីធរកណ្ដាលទាំងមូលពិតជាមានសេចក្ដីសប្បាយចិត្តជាខ្លាំង និងការសាទរ ដោយពួកគាត់ទទួលបាននូវ មណ្ឌលសុខភាពដ៏ថ្មីស្រឡាង កម្រិតស្តង់ដា ព្រមទាំងមាននូវសម្ភារៈជាច្រើនសម្រាប់ផ្គត់ផ្គង់តម្រូវការនៅក្នុងមណ្ឌលសុខភាពនេះ ដែលធ្វើអោយប្រជាពលរដ្ឋមានភាពជឿទុកចិត្ត ក្នុងការទៅរកសេវាផ្សេងៗ នៅមណ្ឌលសុខភាពទាំងនោះ។

ជាចុងក្រោយ ​លោកម៉ននី​ បណ្ឌិត​ ក្នុងនាមខ្ញុុំផ្ទាល់​ និងតំណាងឱ្យប្រជាពលរដ្ឋក្នុងស្រុកស៊ីធរកណ្ដាលទាំងមូល​ សុំថ្លែងអំណរគុណយ៉ាងជ្រាលជ្រៅ ដល់អង្គការភូមិសន្តិភាពអរន្តជាតិ ប្រទេសអាឡឺម៉ង់ ដែលបានជួយឧបត្ថម្ភ ជាអាគារមណ្ឌលសុខភាព មកដល់ស្រុកយើងខ្ញុំ និងសូមជូនពរដល់ សមាជិក សមាជិកានៃ អង្គការភូមិសន្តិភាពអរន្តជាតិទាំងអស់ឱ្យជួបប្រទះនូវ ពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លាងឃ្លាតឡើយ៕